NANGANDAM na ang Police Regional Office-7 alang sa umaabot nga Barangay ug Sangguniang Kabataan Elections sa umaabot Oktubre 30, 2023.
Matud ni Police Lieutenant Colonel Gerard Ace Pelare, tigpamaba ni Police Brigadier General Anthony Aberin, direktor sa PRO-7 nga nagsugod na sila og inventory sa areas of concern apil na ang hotspot area ss Central Visayas.
Apan giklaro ni Pelare nga ang final list himuon sa composite team sa Commission on Elections, Philippine National Police, ug Armed Forces of the Philippines.
“Naa man nay tukuron nga Regional Joint Security Control Center (RJSCC) during elections, right now nag-inventory pa ta, gi-check pa nato unsa tong mga areas nga possible nga naay mo-erupt nga unusual incident”, matud ni Pelare.
Gipahibawo usab ni Pelare nga sa mga umaabot nga semana pagahimuon ang first assessment ug regular na kini nga buhaton hangtud sa Barangay ug SK Elections.
Gibutyag ni Pelare nga tutokan sa PRO-7 ang Negros Oriental kini gumikan usab sa nahitabong pagpangatake ngadto sa Lungsod sa Pamplona diin siyam ang nakalas apil na si kanhi Negros Oriental Governor Roel Degamo.
Sa pikas bahin, dili ipa-tinted sa Police Regional Office-7 ang ilang mga patrol cars ug makig-alayon usab sila sa Local Government Units aron mahangyo nga ang mga sakyanan nga ilang idonar isip patrol car dili himuong tinted.
Alang sa transparency ug aron makita kong kinsa ug unsay gibuhat sa nagsakay sulod sa patrol cars ug aron dili matulog.
Matud ni Pelare nga sa paglingkod ni Aberin sa katungdanan giklaro niini ang pagbalik sa basics ug apil na niini nga mohimo sa ilang trabaho ang kapolisan ug dili matulog. (RTB)
