DAGHANG AKUP-AKUPON SA GAHUM, ug kini maoy hinungdan nga ang mga akup-akupon mahimong dautan.
Kining maong istorya, tinuod. Makita kini sa reyalidad. Masaksihan sa atong palibot.
Ikaw, ana-a ka ba’y kaila nga akup-akupon nga mga tawo: sa kabtangan, kuwarta, ug tanang kalibutanong mga butang? Siyempre, ana-a g’yud.
Daghan kita’g kaila nga mga tawo nga susama niana. Ang nakaparat, kusog kaayo magtakuban nga sila maayong mga tawo.
Sa atong Konstitusyon, ang matag Pilipino anaay katungod nga musulod sa opisina de gobyerno o sa politika.
Kini tungod kay nigakos kita sa “demokrasya” — gihatagan og patas nga pagtratar ug mga katungod ang matag usa kanato.
Pero sa tinuod lang, dili gayud mahitabo nga mahimong patas kay daghang “bintahuso.” Daghang gustong mamintaha. Daghang gustong mulabaw.
Ug labaw niana, daghang daw-an o tig-a matud pa sa mga karaan.
Sa linya pa sa kanta ni Bamboo: …”habang may tatsulok, habang silay nasa tukyok, hindi matatapos itong gulo.”
Kining klase sa mga tawo dili gustong malabwan ilabina kon ang makalabaw kanila mga ordinaryong tawo lamang. Insulto alang kanila.
Dili sila gustong makuhaan ang ilang dungog. Gusto pa hinuong dugangan ang ilang popularidad.
Ang nakapait, pipila lamang kanila nga nakahibawo nga grabe na ang ilang pagpanamastamas sa ubang tawo. Dili na nila makita nga nakatamak na sila og mga katungod. Kon makita man, taphaw ra ang pagtagad.
Mas ilangg gipakadak-an ang garbo. Bisan baho na kaayo ang mga bansagon, magpadayon gihapon sa ilang gusto. In short, “baga” kuno og nawong.
Dali ra ang pagpamilok sa panahon ug piniliay na usab, mao na usab kini ang mahimong sawsawan sa atong mga hisgutanan.
Aw hinuon, kinaham kini sa mga politikanhon og hunahuna, ilabina kadtong mga gitawag og “die-hard supporters” nga suma pa, andam makigpatay. Na mura!
Kon ana-a ka sa sakto, dili ka kinahanglang mosantup sa maong ideya. Pangita-i og paagi nga matul-id ang kunot nga binuhatan.
Pero lage ana-a man kita’y giingon nga “money… talks!” Kuyaw lage basta kuwarta na maoy hisgutan ug palihukon sa mga anaay plano.
Pero kon ako lang ang pasultihon, mangutana ko: Wala pa ba diay kamo pul-i sa mga karaan na og nawong sa katilingban, sa inyong lungsod o barangay?
Dili ba diay kamo gusto og bag-ong liderato? Gusto gihapon kamo og daynastiya? Daynastiya nga gihimong negosyo. Kapoy na kaayo oy!
‘Give chance to others!’ Let them handle the people, the country.
Walay forever sa politika. Bisan unsaon ninyo og paningkamot, mao na’y giingon, mosawop gayud ang adlaw gikan sa iyang pagsidlak. Anaay katapusan ang tanan!
Ayaw na lang i-pugos ang kaugalingon. Atong himuong pananglitan ang mga Marcos, Aquino, Estrada ug uban pa’ng mga dagkong ngalan nga namunoan, niabot ra g’yud ang takna nga ang tawo napul-an na — gusto na og bag-o.
Sa mga nanggungis na diha, pahuway na kamo! Enjoy your life!
Ug sa katawhan, pili na kamo og bag-ong mga lider apan kasaligan.
Kining lindog: ‘Tingog sa Kabatan-onan’, abli sa inyong mga sugyot ug komento. Mamahimo kana ninyong mapaabot pinaagi niining akong numero 09638753562 o sa Facebook ug Messenger account: Wilson Auguis Subrio.
Modawat lamang og seryoso ug dili binuang. Mag-amping kita, mga Bol-anon!
