SI Bise-Gob. Dionisio Victor Balite, isip acting gobernador, mimando sa Community Environment and Natural Resources Office (CENRO) sa Tagbilaran sa paghimo sa pagsusi kalabot sa mga gipangpayag nga mga Acacia sa barangay Taloto ning syudad.
“Ang ahensya karon sa CENRO nagpahigayon na ug imbestigasyon mahitungod sa accacia tree nga giputol, anaa sa Baguio drive. Gitawagan nako ganena ang maong opisina ug gimandoan nga dili ipadugay ang maong imbestigasyon. Manubag ang dapat manubag,” matud ni Balite.
Matud niya nga “Isa ko sa nasakitan sa maong hitabo. kay kining mga kahoya, anha mi tig pasilong sa panahon nga seminarista ko.”
Lakip sa pagsusi mao nga kon duna ba kini pagtugot nga putlon. “Kung naa man, tan-awon pa kini sa gray areas nga matod pa sa giingon sa CENRO. Akong pasalamat sa CENRO sa abtik nga aksyon mahitungod niini, matud ni Balite.
Nabani-og ang pagpamutol sa acacia human si Obispo Abet Uy mipalanog niini sa iyang fb post.
“LOOK | Laing mga dagkong Acacia Trees diri sa Baguio Drive sa Taloto gipangputol na. Kanus-a pa man tawon kita makat-on? Dili pa ba igo nato ang mga daotang telemad-on nga nagakahitabo karon? Gitawag ning lugara sa una og Baguio Drive tungod kay bugnaw ning lugara. Karon, puwede na ni tawgon og Disyerto Drive kay pwerti nang inita.”
“Dili gyud patas ang balaod sa ato. Ang mamutol og pagatpat dakpon; ang mamutol og dagkong acasia dili,” si Obispo midugang sa pagbutyag.
Matud sa buhatan sa bise-gobernador nga mahibal-an karong adlawa ang resulta sa imbestigsyon. (rvo)
