Ni Wilson Auguis Subrio
PERSONAL nga gihatud ni Gobernador Aris Aumentado ang mga financial assistance alang sa tulo (3) ka mga barangay sa lungsod sa Trinidad ug mga barangay sa lungsod sa Bien Unido, San Miguel ug Dagohoy, Abril 4, 2023.
Gitunol ni Gob. Aumentado ang P145,000.00 nga tabang-pinansyal sa Brgy. Kinan-oan nga gidawat sa mga barangay opisyales pinangulohan ni Kapitan Alicia N. Balonga.
P300,000.00 usab ang nadawat sa Brgy. Mabuhay Cabiguhan nga gidawat ni Kap. Armand Avenido ug mga opisyales sa maong barangay.
Niingon usab si Gob. Aumentado nga mohatag og P2,000,000.00 alang sa paghuman sa barangay covered court sa M. Cabiguhan.
Ug P90,000.00 ang nadawat sa Brgy. Hinlayagan Ilaud alang sa pagtrabaho sa Hinlayagan National High School covered court. Ang maong hinabang-pinansyal gidawat ni Kap. Cecilia Alvarez.
Personal usab nga nipasalamat si Gob. Aris sa mga Trinidadnon sa suporta nga gihatag niini sa niaging Piniliay diin nidaug siya sa maong lungsod.
Nitunol usab og tabang-pinansyal ang gobernador sa laing tulo (3) ka mga lungsod sa Segundo Distrito sa maong adlaw.
Ang maong mga barangay mao ang mosunod:
Barangay Liberty ug Mandawa sa Bien Unido, Barangay Cambangay Norte ug Brgy. Kapayas sa lungsod sa San Miguel ug mga barangay sa Dagohoy nga mao ang Malitbog, Caluasan ug Estaca.
Niingon ang amahan sa probinsya nga ang iyang paghatud sa maong mga financial assistance kabahin sa pagbag-o sa nawong sa liderato sa Kapitolyo nga ipaduol ang serbisyo niini sa tugkaran sa katawhan ilabina sa su-ok nga mga barangay.
“Among gisuklian ang inyong kahago sa pag-adto sa Kapitolyo aron mopasa og Resolusyon, kay kahibawo mi nga dili lalim nga magbalik-balik og follow up,” matud sa kugihang alagad sa mga Bol-anon.
Nidugang si Aris nga iya usab pasuruyon si Kongresista Van-van Aumentado aron mohatud og serbisyo-publiko sa kabarangayan sa Segundo Distrito.
Ang maong mga tabang-pinansyal gikan pa sa niaging administrasyon ug nahimong posible pinaagi ni Bise-Gobernador Victor Balite ug Board Member Tomas “Tommy” Abapo Jr., matud ni Aris.
