Ni Wilson Auguis Subrio
DUGANG investment sa Bohol ang pagsulod sa higanteng pundok nga Aboitiz Group nga mamuhunan dinhi, suma sa usa ka post ni Gobernador Aris Aumentado sa iyang FB Page kaniadtong Martes, Marso 28.
Matud ni Gob. Aumentado, interesado ang Aboitiz sa sektor sa power generation ug industrial parks.
“Sa atong pakigmeeting sa mga opisyales sa Aboitiz Group pinanguluhan ni Mr. David Aboitiz, Aboitiz Renewables, Inc. (ARI) Vice President for Commercial Strategy, Sales, and Engagement, ug Mr. Rafael A. De Mesa, Aboitiz InfraCapital Head of Economic Estates, nihatag sila sa ilang interes na mu-invest sa Bohol, ilabi na sa sektor sa power generation ug industrial parks,” butyag sa gobernador.
“Tungod kay nagkaguot na ang Cebu, mao nga mu-expand sila sa Bohol ug mu-invest. Gaplano sila na magtukod una og Solar Farm aron ma-stabilize ang atong suplay sa sugang dagitab, ug sundan dayon kini sa pagmugna ug ecozone,” dugang ni Gob. Aris.
“Nibisita sad kita sa Aboitiz Lima Estate, usa ka 700-hectare PEZA-registered economic zone sa Aboitiz InfraCapital sa Lipa-Malvar, Batangas nga maoy gikonsidera na pinakadakong industrial park sa Pilipinas, aron masaksihan ang usa sa ilang mga ecozone projects,” panapos sa amahan sa probinsya.
Usa ang Aboitiz sa sobra 100 ka mga kompanya nga nipakita sa ilang interes nga motukod sa ilang negosyo dinhi human niingon si Aris nga “abli ang Bohol sa tanang gustong magnegosyo dinhi” ilabina nagtan-aw ang gobernador nga mo-abante gayud ang ekonomiya sa Bohol ug mga Bol-anon, kay makamugna man kini og daghang oportunidad sa trabaho ug makatampo og dako sa panudlanan sa probinsya.
