BISAN pa man og mitak-op na ang Fire Prevention Month, gidasig sa ikaduhang labing-labaw nga opisyal sa Bohol ang mga Bol-anon nga isipon gihapon matag adlaw nga Fire Prevention Day.
Sumala ni Bise-gobernador Dr. Dionisio Victor A. Balite, Ph.D nga mapasalamaton siya sa Bureau of Fire Protection (BFP) sa nagmalampuson nga pagresponde sa mga alarma sa sunog sa tibook lalawigan.
Subay niini, nagpatabang usab si BG Balite sa pagsuta sa tinubdan sa giingong illegal nga pag-refill og LPG butane canisters dinhi sa syudad ug pipila ka bahin sa Bohol kay deklikado kini.
Gipasusi usab sa bise-gobernador ang tampering sa illegal electrical connections o jumpers sa tanang lungsod ug kabarangayan kay usa pud kini sa mga hinungdan sa sunog.
Gipasalamatan usab ni Balite ang mga barangay ug pribadong fire brigades nga katambayayong kanunay sa Bureau of Fire Protection. (RTB)
