SUMA pa sa mga karaan, sa usa ka bulig nga lubi, ana-a kuno’y buang o dili mapahimuslan.
Sa mga empleyado sa Kapitolyo sa Bohol, mao usab kuno ang kasamtangang sitwasyon, ug gani, dugay na ang maong kalaki — nag-abusar sa trabaho.
Ang maong istorya nigawas sa social media ug nahimong sumsuman sa istorya sa mga netizens lakip na sa mga ‘marites’.
Ana-a ang istorya nga anaay mga empleyado sa Kapitolyo nga bisan oras pa nga ting-trabaho, tua kuno sa gawas nagtagay sa kan-anan.
Ang ubang istorya, anaay mga empleyado kuno nga mo-time in ug mo-time out ra apan tua nagserbisyo sa ubang politiko ug wala sa Kapitolyo.
Nigawas usab ang isyu nga ang uban nagdawat og suweldo apan walay klarong trabaho.
Ug ang nakapait, dili kini tawo sa kasamtangang administrasyon apan sa lain.
Tinuod man kini o dili, angay kining tan-awon sa bag-ong administrasyon aron ma-imbestigahan o mapatawag ang mga nag-abusar nga empleyado ilabina kadtong mga ‘regular employees’.
Kay sa oras nga mapamatud-an silang nag-abusar, tukma alang kanila nga tangtangon lakip na ang madawat nga mga benepisyo.
Sa mga empleyado sa Kapitolyo, pagbaton kamo og kauwaw sa mga Bol-anon nga maoy nagsuweldo kaninyo.
Daghang nangandoy nga makasulod sa Kapitolyo apan wala kasulod. Pasabot, suwerte kamo kay nakasulod ilabina ang mga na-regular na.
Kon padayon ang pag-abusar sa maong mga empleyado, mapalyar ang trabaho ug ana-a kini epekto sa paghatud sa serbisyo sa katawhang Bol-anon.
Labaw niana, masayang ang salapi nga gihaguan ilabina sa mga kabus.
Kining lindog: ‘Tingog sa Kabatan-onan’, abli sa inyong mga sugyot ug komento. Mamahimo kana ninyong mapaabot pinaagi niining akong numero 09638753562 o Gmail: subriowilsonauguis@gmail.com o sa Facebook ug Messenger account: Wilson Auguis Subrio.
Modawat lamang og seryoso ug dili binuang. Mag-amping kita, mga Bol-anon!
