DAGHANG mga tawo ang wala masayod kon unsay angay buhaton aron magpuyo nga hamugaway. Kanunay nga gisungog sa mga pagsuway. Adunay daghang higayon nga maputong tungod sa kalisod ug kapit-os. Dili makalikay sa dautang mga hunahuna, ang uban hulhugon nga mohunos sa kaugalingong kinabuhi. Sa panahon nga sama niini, gikinahanglan ang kalig-on sa kaugalingon inubanan sa hugot nga pagtuo ug pagsalig sa Labawng Magbubuhat. Gihigugma sa Dyos ang kalibotan ug gihatagan ang tawo sa kahigayonan nga maluwas sa iyang kasal-anan. Tungod sa gugma sa Dyos sa katawhan sa kalibotan, dili gayud Niya kini pasagdan.
Ang mga suliran ug pagsuway kabahin kini sa kinabuhing kalibotan. Ang tawo angay masayod niini nga kamatuoran. Gihatagan ug galamhan ug gawasnon pa gihapon nga mobuhat subay sa mando sa iyang konsyensya. Ang iyang himoong sukdanan mao ang pagkamaayo ug pagkadautan. Maoy hinungdan nga dili gayud angay nga mawad-an ug paglaum sa kinabuhi. Ang tawo gihimong piniyalan sa mga gasa ug panalangin gikan sa kahitas-an. Gisalig ngadto kaniya ang halos tanang butang gawas niadtong gidili. Gihimo nga kasugoan ug gidid-an nga mokaon sa bunga sa kahoy sa kinabuhi. Gisupak kini sa tawo nga misangpot sa pagpakasala.
Sud-unga ang atong palibot. Ang atong makita maoy mga grasya ug panalangin nga gipiyal ngadto sa mga tawo. Ang kinaiyahan buhong sa tanang panginahanglan ug gikinahanglan aron ang mga tawo mabuhi. Bisan gitunglo si Adan nga magpatulo ug singot sa pagbugwal sa yuta aron makakaon, kini nga kahimtang maoy usa ka dakong hagit. KIni maoy silot sa pagsupak sa kasugo-an ug pagpakasala. Ang mga langgam nabuhi nga wala magbugwal sa yuta, apan sila nabuhi. Unsa pa kaha ang tawo nga labawng gihigugma sa Dyos, ug gipakamatyan ang iyang kasal-anan. Walay bayad ang hangin, silaw sa adlaw, init ug uwan.
Ang mga tawo wala makakita niini nga kahigayonan. Wala kini hatagi ug bili. Gi-abusahan, giusik-usikan ug gipanamastamasan sa mga tawo ang kalibotan. Nagkasakit ang atong kalibotan karon. Sa niini nga kahimtang, buta ug bungol ang mga katawhan. Padayon sila nga wala magpakabana. Isip maayong piniyalan, adunay kitay dakong katungdanan sa pagpahiuli sa maayo niini nga kahimtang. Ang atong pagpasagad maoy hinungdan sa nasinati nga kalisod ug kakabus. Dili pa ulahi nga mag-usab sa atong kinaiya ug binuhatan. Angay nga magkahiusa sa pagmugna ug kausaban tumong sa kaayoahan ug kabulahanan.
