Ni Wilson Auguis Subrio
LAING kalambuan na usab ang mosulod sa Bohol sa industriya sa power sector.
Kini ang gipahibawo ni Gobernador Aris Aumentado pinaagi sa iyang post sa iyang FB Page kaniadtong Huwebes, Marso 23.
Matud ni Gob. Aumentado, namahayag ang mga representante sa Shanghai Electric Wind Power Group nga magtukod sila og usa ka wind farm dinhi sa Bohol.
Ang maong grupo niingon nga “gusto nilang mabarog ang maong wind power plant ‘as soon as possible’, ug dako ang ilang interes nga matuman kini.”
“Gikinahanglan nato ang dugang suplay sa kuryente diri sa probinsya, mao nga welcome para kanato ang ilang pagsulod. Andam usab kita nga modawat sa uban pang mga investments sa power sector, ilabi na sa renewable energy,” panapos ni Gov. Aris.
Una ng nisulod ang Petro Green Energy Corporation (PGEC) sa Bohol kaniadtong Septiyembre 27 sa niaging tuig pinaagi sa usa ka ceremonial launching sa San Vicente, lungsod sa Dagohoy diin tukuron ang maong solar power plant.
Mokabat sa bilyones ang kantidad sa maong proyekto nga mao ang Dagohoy Solar Power Project (DSPP) nga gipaluyuhan sa Depertment of Energy (DOE).
Kon mahuman ang maong proyekto nga anaay 42,300 solar panels, 63 string inverters ug makahatag og 27 megawatts (MW), makaserbisyo kini sa 50,000 households sa Dagohoy. Gisugdan na kini og trabaho.
