NIKORTESIYA si 2nd district Congw. Vanvan Aumentado didto sa Senado kon diin iyang nakahimamat ang mga senador ug ilang mga sinaligan.
Mahitungod kini sa mas pagpalig-on sa maayong relasyon sa iyang buhatan ngadto na sa Senado ug sa Ubos Balay Balauranan.
Ang mas lig-on nga pakig-alayon sa kanunay niresulta sa pagbubo sa minilyon ka mga proyekto dinhi sa lalawigan .
Lakip sa mga gipanghingusgan ni Congw. Vanvan mao ang healthcare facilities ug infrastructure lakip na ang pagsiguro nga dunay igong pundo alang sa medical/hospital assistance sa iyang mga ginsakopan sa Segundo Distrito.
Nitambong usab siya sa usa ka tigum sa LAKAS-CMD nga iyang Partido pulitikal ug mao usab ang partido ni House Speaker Ferdinand Martin Romualdez.
Lakip sa mga kongresista nga nipasilong sa LAKAS-CMD mao sila Congw. Emmarie “Lollypop” Ouano-Dizon ug Congw. Daphne Lagon.
Si Ouano-Dizon maoy representante sa Lone District sa Dakbayan sa Mandaue ug anak siya ni kanhi mayor Teddy Ouano.
Sa laing bahin, si Lagon ang kapikas sa kinabuhi ni Ako Bisaya partylist Cong. Sonny Lagon. Nagrepresentar siya sa mga lungsod sa Consolacion ug Cordova.
Iyang anak si Cordova Councilor Larenz Lagon nga maoy NMYL Chairman sa Central Visayas. Si Bohol 2nd district Board Member Atty Jamie Aumentado Villamor maoy NMYL Chairperson sa Bohol. (Kahlil Lester O. Camba)
