Ni Wilson Auguis Subrio
TULO (3) ka mga barangay sa lungsod sa San Isidro ang na-grasyahan og P1.9 milyones gikan sa Kagamhanang Probinsyal sa Bohol.
Mao kini ang gipahibawo ni Gobernador Aris Aumentado pinaagi sa iyang post sa iyang FB Page kaniadtong Huwebes, Marso 23.
“Atong gihatod ang mga serbisyo sa Kagamhanang Probinsyal ngadto sa barangay Baunos, San Isidro uban sa Cansagui Sur ug Cansagui Norte,” matud ni Gob. Aumentado.
Si San Isidro Mayor Diosdado Gementiza Jr. maoy gitunulan sa maong Financial Aid nga nagkantidad og P1,900,000.00 alang sa paghuman sa San Isidro National High School Multi-Purpose Building.
“Aduna usab umaabot nga tabang alang sa multi-purpose covered court sa lungsod, sa pagpahigayon ni Congresswoman Vanvan (Aumentado) ug ang financial aid para sa kabarangayan gikan sa Kagamhanang Probinsyal,” dugang sa gobernador.
Nihangyo usab si Gob. Aris sa mga nihawa sa sabakan sa gobyerno nga mobalik na.
“Ato usab gipahibalo kanila nga andam kita pagtabang sa atong mga kaigsoonan nga anaa sa lahi nga baruganan kung mubalik sila sa landong sa pangagamhanan,” panapos sa amahan sa probinsya.
