Ni Wilson Auguis Subrio
CANDIJAY, Bohol — Nitimbaya si Gobernador Aris Aumentado sa pag-abli sa bag-ong Candijay Substation sa Telephone and Radio System Integrated Emergency Response 117 kon TaRSIER 117.
Kini ang gipaambit ni Gob. Aumentado pinaagi sa usa ka post sa iyang Facebook Page kaniadtong Biyernes, Marso 24.
“Akong ipaabot ang akong dakong pagtimbaya alang sa pag-abli sa bag-ong Candijay Substation sa TaRSIER 117 o Telephone and Radio System Integrated Emergency Response 117, nga nahimutang sulod sa Candijay Community Hospital sa mao nga lungsod. Nitambong kita sa gipahigayong programa kabahin niini,” matud ni Gob. Aris.
“Gipondohan kini og tres milyones gikan sa DRRM fund sa Kagamhanamg Probinsyal, ug serbisyuhan niini ang mga lungsod sa silangang bahin sa probinsya sama sa Candijay, Guindulman, Anda, ug Alicia,” dugang ni Aris.
“Ang maong launching and blessing ceremony gipahigayon uban sa pagselebrar sa PDRRMO sa ika-12 na anibersaryo sa katukuran sa TaRSIER 117. Nanghinaot kita sa padayong kalampusan nila sa pagserbisyo sa katawhang Bol-anon,” panapos sa gobernador.
Ang TaRSIER 117 mo-rescue kon anaay mga disgrasya sa kadalanan.
