PITO (7) ka buwan na lang kapin og Barangay and Sangguniang Kabataan Elections (BSKEs) na, kon dili ma-postpone og balik.
Dali ra ang pag-irog sa panahon ilabina kon dili bantayan. Inig pamilok, eleksyon na.
Ang uban base sa akong mga nadunggan sa mga ‘marites’, hipno na ang ilang grupo gikan sa SK chairman, mga kagawad ug kapitan. Andam na.
Sa laing bahin usab, ang uban wa pa ka desisyon kon modagan ba gayud ilabina kinahanglan og kuwarta bisan barangay ra.
Ang uban usab nga pundok, kuwangan pa. Giluto pa kuno ang ilang linya.
Naay uban usab nga anaay gihimong panagsabot sa laing grupo, sama sa tunga sa managan. Pananglitan, sa usa ka grupo 3 ka kagawad ang modagan ug sa lain, 4 ilang kagawad unya dili pakontrahan ang kasamtangang kapitan.
Kasagaran kanang mahitabo kon apiki sa bulsa ang laing grupo ilabina kon incumbent ang kontra.
Apan kini ang angay nga hinumduman sa atong mga kaigsoonan sa matag barangay kon gusto nga tinud-anay nga mo-abante ang inyong lugar: ayaw na padani sa mga ngisi-ngisi ug kilo-kilo nga patagad sa mga mokandidato o kasamtangang mga opisyales nga mobalik og dagan karong Oktubre.
Ayaw padani sa mga mokandidato og balik nga walay agi o klarong agi sa ilang pangatungdanan sukad sa niaging Piniliay hangtud karon.
Ayaw padani sa ilang pa-inom og imnunong makahubog. Ayaw i-baylo ang boto sa usa ka lapad o usa ka grande.
Ana-a ang mga reklamo sa katawhan nga ang ilang mga opisyales sa barangay o kadaghanan nila, walay nahimo sukad 2018 hangtud sa kasamtangan, sige lang kuno og dawat sa honorarium o suweldo.
Atong hinumduman nga sa pagpili og mga lider nakasandig ang kaugmaon sa atong barangay: kon ang mapili mga ligdong, maayo kaayo. Apan kon mga walay alamag sa pagpangalagad o tapuwan mo-serbisyo ug suweldo ra ang giapas, alaot ang barangay ug ang katawhan.Ang katawhan maglibog usahay kon kinsa ang pili-on ilabina kon daghang mga kaliwat ang magpapili.
Bisan walay kapasidad nga mo-alagad, hala pili-on kay lage kadugo o amigo o pare o mare ba kaha.
Undangon na ang maong mentalidad, kay kon ipadayon kana, walay klaro nga kalambuan ug kauswagan ang inyong barangay.
Dili nato sayangon ang atong i-suweldo nila unya walay klaro ang mga molingkod sulod sa tulo ka tuig o sobra pa.
Pili-a ang anaay klarong kapasidad ug anaay kamauhan sa pagpanday og mga Ordinansa nga makatabang sa pag-abante sa barangay.
Ug labaw niana, pili-a ang mga kasaligan ilabina ang dili mga kawatan o walay buling sa ilang pagkatawo. Walay dautang rekord ba.
Kining lindog: ‘Tingog sa Kabatan-onan,’ abli sa inyong sugyot ug komento kabahin sa nagkadaiyang mga isyu nga atong gihisgutan. Mamahimo kana ninyong mapaabot pinaagi sa akong numero 09638753562 o sa akong Facebook ug Messenger account: Wilson Auguis Subrio.
Modawat lamang og seryoso ug dili binuang. Mag-amping kita, mga Bol-anon.
