KON wala sila, kuwang ang atong kinabuhi. Maglisod og barog ang usa ka pamilya.
Atong giselebrar sa niaging adlaw ang Adlaw sa Kababayen-an isip pasidungog sa ilang mga sakripisyo ug pag-amuma kanato: mga anak ug kapikas sa kinabuhi.
Ang mga inahan suma pa sa kasaysayan maoy binlan sa mga buluhaton sa balay ug tig-alagad sa iyang bana.
Wala kaayo’y dagkong papel kaniadto ang kababayen-an ilabina ang mga inahan.
Huyang sila sa gahum ug wala kaayo’y edukasyon kay ang sosyodad gi-konsiderar lamang nga alang sa kalalakin-an, nga maoy giilang dominante.
Ang popularidad ug pagka-bantugan alang lamang sa kalalakin-an ilabina sa nataran sa Siyensya, sa Politika, Sosyal ug Ekonomikal nga tahas, ug uban pa.
Karon sa modernong panahon, ilawom usab sa mandato sa atong Konstitusyon ug sa mga balaod, giila na ang kababayen-an nga may patas nga pagtratar.
Makita usab sa atong pang-gobyerno nga daghan ng mga babaye nga magbabalaod. Ana-a na sila’y tingog ilabina ana-a ang Magna Carta for Women nga nagprotehir sa ilang mga tawhanong katungod.
Dili ikalimod nga mas dominante gihapon ang kalalakin-an sa bisan unsang aspeto apan sa dili madugay, dili posible nga mahimo ng balanse alang sa kalalakin-an ug kababayen-an ang katilingban.
Kon ang mga amahan maoy haligi sa panimalay, ang mga inahan giila usab nato nga mga kahayag sa panimalay.
Dili lalim ang ilang tahas sa matag bobong: atiman sa mga anak ug sa nagtapun-og nga mga trabaho ug ang pag-alagad sa ilang bana.
Apan sa kasamtangan bilib kita sa mga inahan ug kababayen-an kay kahibawo na sila mobuhat sa mga buluhaton sa mga amahan ug kalalakin-an.
Ana-a na sila’y posisyon ug propesyon sa komunidad o sosyodad man ilabina kadaghanan usab sa atong mga magtutudlo mga babaye.
Ang atong pagsaludo alang sa mga inahan dili mahurot dinuyugan sa pagtahud.
Malipayong pagsaulog sa Adlaw sa mga Kababayen-an ilabina sa mga inahan, mga minahal nga inahan!
Hinaot hatagan pa kamo og dugang kusog ug inspirasyon. Mabuhay!
Kining lindog: ‘Tingog sa Kabatan-onan’, abli sa inyong mga sugyot ug komento. Mamahimo kana ninyong mapaabot pinaagi niining akong numero 09638753562 o Gmail: subriowilsonauguis@gmail.com o sa Facebook ug Messenger account: Wilson Auguis Subrio.
Modawat lamang og seryoso ug dili binuang. Mag-amping kita, mga Bol-anon!
