GIKONPIRMAR ni Provincial Legal Officer Handel Lagunay nga gisuspenso sulod sa 60 ka adlaw sa iyang trabaho sa kagamhanang probinsyal ang pangulo sa Office of the Provincial Agriculture (OPA) nga si Dr. Larry Pamugas.
Matod ni Lagunay nga gisilbi ang suspension order ni Pamugas niadtong Marso 1, 2023 mga pasado alas 4:00 na sa hapon.
Dugang niya nga si Governor Aris Aumentado ang nipirma sa maong kamanduan sa wala pa kini mobiyahe paingon sa nasud sa Israel.
Ang 60-day preventive suspension kabahin sa proseso human si Pamugas nag-atubang sa administrative complaint nga gisang-at sa Office of the Governance Accountability and Review (OGAR) ngadto sa Office of the Governor.
Una niini, ang OGAR nisang-at sa complaint nga grave misconduct, gross neglect of duty, commission of an act punishable ubos sa anti-graft law. (RTB)
