SA nahibilin nga duha na lamang ka buwan, 2 pa lamang sa matag napulo ka tawo nga migamit og selpon ang nakaparehistro na.
Ug sa sunod nga 55 ka adlaw, kon dili mopaspas ang pagparehistro sa mga subscriber information module (SIM) nga maoy nagpadagan sa selpon, gikahingawa sa mga naniid nga daghan ang tag-iyahag numero sa mobile phone ang ma-de-activated sugod sa Abril 26.
Segun sa taho sa National Telecommunications Commission (NTC) pinaagi ni Nelson Magallanes, anaa pa sa kapin og dyutay sa 20% ang mga tag-iyahan og celpon nga nagaparehistro sa ilang mga numero gikan sa Disyembre 27.
Didto sa SIM Sign Up and Registration nga gitanyag sa Philippine Information Agency kauban sa AUDIO Bohol, National Telecommunications Commission (NTC) ug Department of Information Communications and Technology (DICT), , kinahanglang ang tanan nga SIM nga gigamit sa Pilipinas, marehistro na aron mailhan na kon kinsa ang mga tag-iya niin ug kapugngan na ang mga binuang ug mga illegal nga kalihukan nga gigamit ang selpon.
Subay sa Republic Act No. 11934 o ang mas nailhan nga SIM card law, balaod na ang pugos nga pagparehistro sa SIM cards human kini mapalit ug sa dili pa kini i-activate.
Ug kay ang balaod nagmandu usab sa tanan nga mobile phone users lakip na ang nanag-iya og prepaid o post paid numbers sa pagparehistro niini, gihatagan og higayon ang tanan nga makaparehistro sulod sa upat ka buwan human kini gisugdan niadtong Disyembre 27.
Ang RA 11934 maoy labing una nga balaod nga gilagdaan ni Presidente Bongbong Marcos, kinsa nagtuo nga kini makahatag og solbad sa mga scams o pangilad nga ming-gamit sa mobile phones aron mangbiktima.
Apan, human sa katunga na sa panahon nga gitagal aron makaparehistro na ang tanan, wala pa sa 30% ang kinatibuk-ang nakarehistro.
Subay niini, Globe Telecom’s Channel Transportation Strategy Development manager Jose Luis Varquez, mipahinumdon nga kon sulod sa 180 ka adlaw human mahimong balaod, ang wala makaparehistro, matangtangan sa gamits a ilang mobile phone services, ug hangtud kini marehistro na, dili na kini mahibalik.
Sa katungod sa SMART, giawhag usab ni Tiara Carillo ang pagpahimulos sa higayon nga layo pa ang katapusang adlaw sa pagrehistro, aron dili mahiapil sa mahutdan na unya sa oras ug makasinatig kahasul nga mawad-an sa gamit sa ilang selpon.
Ang SMART og Globe gikauban sa Philippine Information Agency, Bohol Island State University ug sa Department of Information and Communications Technology didto sa SIM sign-up didto sa Activity Center sa Bohol Island State University Tagbilaran City Campus.
Didto, naparehistro ang mga SIM sa mga estudyante, mga sakop sa Association of United Development Information Officers ug mga higala niini nga nakalugar og suroy sa lugar. (PIA-7/Bohol)
