SEMENTOHON na ang main canal service road sa Malinao Irrigation System, salamat sa tinabangay sa National Irrigation Administration (NIA) Region VII ug sa Department of Public Works and Highways- Bohol 3rd District Engineering Office (DPWH-Bohol 3rd DEO).
Marso 2, 2023, gilagdaan tali sa NIA-7 ug DPWH Bohol 3rd DEO ang Memorandum of Agreement (MOA) alang sa pagpasemento sa Malinao Irrigation System main canal service road sa Brgy. Estaca, Pilar.
Kini, kapundohan na gayud sa P14.7 million, pinaagi sa Kalsada Tungo sa Patubigan Program sa DPWH.
Kini nga katikaran, gikalipay ni NIA R7 Regional Manager Engr. Reyne B. Ugay, kinsa miangkon nga kasagaran sa ilang mga service roads, dili gyud sementado tungod sa igo-igo lang usab ang budget sa NIA.
Sa limitado nga budget, usahay gani, ang ilang mga patubig nga canal, dili gani sementado, kay tuyo ug tumong gayud nga mapaabut ngadto sa mga labing nanginahanglan sa patubig, kay lagi, patubig man ang ilang mandatus, saysay ni Engr Ugay atul sa paglagdaay sa MOA.
Matud pa usab sa DPWH, kini nga pagsemento, kabahin sa ilang DPWH Convergence and Special Support Programs ubos sa Sustainable Infrastructure Projects Alleviating Gaps (SIPAG).
Kini, gipasabut sa DPWH nga nagtumong nga makahatag og akses nga mga dalan ug tulay gikan sa nasudnong mga dalan paingon sa mga pasilidad sa goberno ug kadtong mga establisemento nga nagserbisyo sa mga gikinahanglan sa mga tawo.
Gani, matud pa ni DPWH Bohol 3rd DEO District Engineer Magiting A. Cruz, kini pa ang labing una nila nga karsada nga sementohon kaabag ang NIA, nga ilang nakita nga dakong hagit.
Apan, dugang niya, pinaagi niining pagsemento, makuhaan og kalisud ug kahasul ang mga mag-uuma sa ilang agi-an, ilabi na gayud sa panahon sa ti-uwan.
Niinig bag-o lamang, gimanduan ni Presidente Ferdinand “Bongbong” Marcos Jr. ang NIA ug DPWH nga magtambayayong ug paspasan ang pagpatuman sa high-impact irrigation projects.
Mismo si NIA R7 Engineering and Operations Division Manager Engr. Orencio Apale, mipahayag nga kini nga kaugmaran, makasaysayanon sa duha ka ahensya nga naggigunitay aron i-as-dang ang mga kaayohan alang sa mag-uuma.
Sa kantidad sa kontrata nga P14.7 million, mahilakip na niini ang pagsemento sa 800 metros nga karsada subay sa main canal sa Malinao Irrigation System, apil na ang pagbutang sa mga kongkretong ali niini, slope protection, ug mga babag pagpugong sa aksidente nga pagkatagak sa mga mo-agi.
Sa MOA, ang DPWH maoy moandam sa plano, detalyadong banabana sa galastohan apil na ang pagpangompra sa materyales, pagpatrabaho ug superbisyon niini.
Kon mahuman na, kini itugyan na ngadto sa NIA 7 alang sa maintenance sa proyekto. (PIABohol/NIA-7)
