GIPAMATUD-AN sa Sandiganbayan Sixth Division ang graft conviction ni kanhi Panglao mayor Leonila Montero tungod sa pagkuha sa upat ka napildi nga mga kandidato isip job-order employees sa munisipyo bisan kon wa pa matapos ang usa ka tuig nga appointment ban sa wala molampos nga electoral bets.
Sa usa ka resolusyon nga giproklamar niadtong Martes, Pebrero 21, 20923, ang anti-graft court walay nakitang merito sa motion for reconsideration (MR) ni Montero nga gisang-at niadtong Nobyembre 7, 2022 aron balihon ang iyang konbiksyon sa upat ka ihap sa graft.
Napakyas si Montero sa pagdani sa Korte nga nasayop kini sa pagpabor sa mga kamatuoran ug sa pagpadapat sa balaod sa mga ebidensya nga gipresentar.
“Montero’s criminal intention to circumvent the constitutional and statutory provisions prohibiting the appointment of losing candidates were proven by the evidence presented by the Prosecution and Defense,” matod sa Sandiganbayan sa 10 ka pahina nga resolusyon niini.
Niadtong Oktubre 26, 2022, si Montero gisentensiyahan og 24 ka tuig nga pagkabilanggo human mapamatud-an sa Sandiganbayan nga sad-an siya sa upat ka ihap sa paglapas sa Section 3(e) sa Republic Act 3019, o nailhan nga Anti-Graft and Corrupt Practices Act.
Ang anti-graft court nipahamtang og silot nga pagkabilanggo nga unom ka tuig ug usa ka bulan nga minimum ug hangtod sa 10 ka tuig nga labing taas sa matag ihap sa upat ka graft convictions.
Alang sa iyang civil liability, gimandoan si Montero nga bayran ang Panglao local government unit (LGU) og P1.3 milyones aron i-account ang sweldo ug benepisyo nga gibayad sa upat ka mga job-order personnel, dugang legal nga interes.
Gipadayon usab sa korte ang usa ka hold departure order nga gi-isyu kaniadto batok sa kanhi punong ehekutibo.
Ang pagkakombikto ni Montero sa paglapas sa RA 3019 naggumikan sa iyang pagsuway nga “makalikay” sa usa ka tuig nga appointment ban pinaagi sa pagkuha sa mga kandidato nga napildi sa miaging eleksyon isip job-order personnel niadtong 2013.
Sa iyang pag-asumir sa katungdanan niadtong Hulyo 1, 2013, gi-hire ni Montero si Noel Hormachuelos isip municipal administrator, Danilo Reyes isip public information officer, Fudulan isip Public Employment Service Office coordinator, ug Penales isip consultant sa infrastructure ug engineering services.
Ang job-order personnel, gawas kang Hormachuelos nga running mate ni Montero, nag-ilugay alang sa mga lingkoranan sa Sangguniang Bayan sa lungsod atol sa piniliay sa samang tuig diin apildi silang upat. (RTB)
