SI Congresswoman Alexie Tutor mibugtaw sa pagpatukod sa balay alang nila ni Gulberto ug Gerlie Postanes sa barangay Bagumbayan, Pilar, Bohol, kinsa mga biktima sa mangtas nga bagyong “Odette” niadtong Disyembre 16, 2021.
Ang naasoyng Pabahay project mao ang ika-126 nga panimalayng libre, isip “akong Halad sa Pamilya, Balay na puno sa Paglaum, Gugma ug Panaghiusa,” matud ni Kongresista Tutor sa iyang facebook post karong bag-o.
“Ang balay nga atong gihalad wala gyud tawn nya damha. Mao gyud ni ang gi-ingon nga sa kadaghang tao, ikaw gyud ang napilian. Buot pasabot nga para gyud ni nmo.”
Basi sa saysay sa magtiayon kaniya, giasoy usab ni Tutor: “Sa panahon sa Odette, arang kusoga sa hangin. Ang iyang gibuhat, gi-huktan niya ang ilang higdaanan ug didto cya, uban ang duha nya ka anak ni tago sa ilawom sa higdaanan. Ug wapa to sila nitago sa ilawom, ang mga bata, basin ma apil ug kapalid sa hangin sama sa pagka palid sa ilang balay.”
Ang makadawat sa Pabahay project mao kining mosunod: (1). Ang pinaka luoy/mas nagkinahanglan niini; (2). Dunay kaugalingon na yuta.; (3). Preferred: kasado ; (4). Preferred: daghan ug anak; ug (5). Gikasabotan sa barangay council.
Si Mayor Wilson Pajo sa Pilar, Bohol mikuyog sa pag-inugural sa balay ngadto sa mga Postanes. (rvo)
