DILI SA TANANG PANAHON SWERTE ang mga kawatan, mangingilad o kurakot, matud pa sa mga karaan.
Sa akong obserbasyon, tinuod gayud kini. Kay muabot man gayud ang takna nga masakpan o mahibaw-an ang dautang binuhatan.
Ang kinabuhi susama ra sa salida sa tv, anaay bida ug anaay mga kontra-bida.
Ang mga tawo nga magpakabana ug manginlabot sa panghitabo sa atong palibot ilabina sa pang-gobyerno ug pamolitika, maoy gitawag og mga bida.
Samtang kadtong mga abusado, kurakot ug hambugero nga mga tawo ilabina kadtong mga politiko, maoy kontra-bida.
Sayod kita nga sa atong komunidad ug sa kinatibuk-ang katilingban, daghan ang kawatan, kurakot ug mangingilad.
Mas daghan kanila ana-a sa puwesto sa gobyerno kaysa sa mga pobre ug walay dakong alamag.
Ang gaba matud pa sa mga karaan, dili pareha sa sili nga mohalang dayon. Ana-a kini taas nga proseso o depende kon ipanunton na sa kahigayonan o magpatunga na ang Kahitas-an.
Ang hustisya nga gipangayo sa mga kabus ug dinaug-daug, ana-a kana apan kinahanglan og sakripisyo o paglihok.
Kon ikaw wala na kaangay sa mga lider sa katawhan apan nagpakahilom ra kay mahadlok, padayon kang mag-antos.
Maong mogara ang mga kurakot, mangingilad ug kawatan kay kutob lang sa bagulbol ang uban kanato.
Kon mo-hari ang pagkatalawan sa atong dughan, kanunay kitang sungugon sa mga mapahimuslanon sa atong katilingban.
Ang mga kuwartahan ng daan (ilabina ang mga limbungan), mo-dato og samot, samtang ang mga pobre, mosamot og kaalaot.
Mao kana ang sakit nga reyalidad karon sa atong nasud Pilipinhon. Nag-aginod kita kanunay kay daghang abusado sa atong pang-gobyerno ug ang uban o kadaghanan ba kaha kanato, dili mag-apil-apil kay dili gusto og samok.
Panginlabot ug pagpakabana aron matingkagol sa bilanggoan ang mga buaya sa gobyerno ug politika.
Apan ayaw kabalaka, dili magdugay ang swerte sa mga tawo nga nagbuhat og supak sa balaod sa Tawo ug sa Ginoo ilabina kadtong nagpahimulos sa atong mga hinaguan.
Moabot ra nga sila mahukman. Moabot ra ang ilang panudya. Dili man karon o ugma, paabota lang. Labaw niana, paningkamoti nga makab-ot ang hustisya.
Kining lindog: ‘Tingog sa Kabatan-onan’, abli sa inyong mga sugyot ug komento. Mamahimo kana ninyong mapaabot pinaagi niining akong numero 09638753562 o sa Facebook ug Messenger account: Wilson Auguis Subrio.
Modawat lamang og seryoso ug dili binuang. Mag-amping kita, mga Bol-anon!
