Ni Wilson Auguis Subrio
USA ka 4 anyos nga bata nga may buslot sa kasing-kasing ang malampusong na-operahan didto sa Philippine Heart Center sa Quezon City pinaagi sa Programang Health ni Segundo Distrito Kongresista Van-van Aumentado ug nakagawas kaniadtong Valentine’s Day, Pebrero 14.
“Sa adlaw sa Kasing-kasing Valentines Day, dunay usa ka bata nga nakagawas gikan sa Philippine Heart Center, Quezon City,” matud sa Facebook post sa bag-ong magbabalaod.
Niingon usab si Kongresista Van-van nga ang maong programa iyang nasunod gikan nila kanhi gobernador ug kanhi kongresista Erico Boyles Aumentado ug kanhi kongresista ug karon gobernador Aris Aumentado.
“Sukad pa sauna, sa panahon sa akong Father in-law Former Gov Former Cong Erico Boyles Aumentado, daghan nang patients naka benepisyo sa maong programa ug gipadayon ni Kanhi Cong now Bohol Gov, ug karon ako nausab kining gipadayon,” dugang niini.
Ang benepisyaryo nga na-operahan mao si Marvii Recones Amoguez, 4 anyos, taga-Villa Aurora, lungsod sa Dagohoy.
May kinatibuk-ang assistance nga P500,000.00 ilawom sa Programang Health ni Kongresista Aumentado pinaagi sa DOH-Medical Assistance to Indigent Patients (MAIP).
Nagpasalamat si Kongresista Van-van sa taga-DOH ug niingon nga andam ang iyang oposina nga motabang sa manginahanglan og serbisyong medikal.
“Ang atong opisina, andam mo tabang. We are happy to serve you,” panapos niini.
Si Kongresista Van-van usa ka health advocate kinsa usa ka nars sa wala pa mosulod sa kalibutan sa politika.
