MAINITONG gidawat sa Kagamhanang Probinsiyal sa Bohol (PGBh) ang Philippine Red Cross (PRC)- Bohol Chapter ug ang nagkalain-laing International Red Cross nga organisasyon kaniadtong Merkules, Pebrero 15, alang sa usa ka courtesy call sa Governor’s Office.
Ang PGBh Chief-of-Staff nga si Atty. Filipina Piollo ang mirepresentar ni Gobernador Erico Aristotle Aumentado sa pakigabi-abi sa mga organisasyon nga mibisita sa Probinsya alang sa usa ka cross-learning exchange program ug implimentation project sa PRC nga nag-ulohang: “Greening Disaster Risk Reduction: saving lives through working with nature.”
Kauban ni Piollo sa pag-abiabi si Bohol Provincial Environment Management Office (BPEMO) OIC Jovencia Ganub ug ang Provincial Disaster Risk Reduction Management Office (PDRRMO) head nga si Anthony Damalerio, nga mao usab ang Vice Chairman sa PRC-Bohol Chapter.
Tumong sa proyekto ang “pagpalig-on sa komunidad” batok sa mga peligro nga dala sa mga natural hazards, pinaagi og evidence-based, nature-based solutions (NBS).
Ang Cross-learning exchange giapilan sa Philippine Red Cross Greening DRR project implementers, kauban ang Vietnam Red Cross, Jamaica Red Cross, IFRC Geneva, IFRC Bangkok, IFRC Caribbean, IFRC APRO, IFRC Philippines, American Red Cross AMEE, American Red Cross Vietnam, American Red Cross Philippines, USAID BHA, ug USAID Peace Corps.
Mipili ang PRC og tulo ka Bol-anon nga barangay isip unang mga benepisyaryo sa gitawag nga “pioneering project.”
Giila sa organisasyon ang Brgy. Manaba, Garcia Hernandez , Brgy. Bonkokan Ubos, Lila, ug Brgy. Valladolid, Loboc isip mga lugar nga peligro sa mga natural hazard, sama sa pagbaha, landslide, ug storm surge.
Nagpahigayon ang PRC og mga kalihokan kauban ang tulo ka barangay gikan sa Disyembre 2021 hangtod sa Disyembre sa miaging tuig.
Ang PGBh, pinaagi sa BPEMO ug PDRRMO, mipasalig sa pagtabang sa PRC sa proyekto pinaagi sa baseline surveys, Community Based Disaster Risk Reduction and Management Training (CBDRRMT) ug Enhanced Vulnerabilities and Capacities Assessment (EVCA), Implementation of Community Action Plan, ug Sharing Lessons.
Gipasalig usab ni Gobernador Aumentado nga tabangan ang PRC sa disaster risk reduction project ug mogahin ug 50,000 pesos matag barangay.
Naglaum ang PRC nga makamugna og mas lig-on nga solusyon batok sa mga katalagman pinaagi sa tulo ka adlaw nga cross-learning ug project implimentation kauban ang mga nagkalaing-laing internasyonal nga Red Cross organisasyon. (Wilson Auguis Subrio with reports PiMO/GMC/AT)
