CARMEN, Bohol — Nipahigayon ang Kagamhanan sa Probinsiya sa Bohol (PGBh) og public outreach program nga nag-ulohan og service caravan, nga nagtanyag og nagkalain-laing serbisyo publiko gikan sa lain-laing departamentl sa PGBH alang sa mga residente sa Brgy. Villafuerte, Carmen, kaniadtong Huwebes, Pebrero 16.
Ang mga lumulupyo sa maong dapit nakadawat og libreng tabang sa gobyerno, sama sa medical/dental check-up, bakuna, cooperative assistance, legal counseling, dengue testing, urinalysis, distribusyon sa tambal, libreng tuli, tupi, ug feeding program.
Niapod-apod usab ang PGBh og 100 ka semilya sa mga punoan sa prutas, mga tambal sa binuhing kahayopan, 400 ka binhi sa gulay, 9,000 ka tilapia nga fingerling, ug 205 ka sa school supplies para sa mga tinun-an sa Villafuerte Elementary School, gikan sa Daycare hangtud sa Grade 6.
Ang maong kalihukan maoy hiniusang paningkamot sa PGBh uban sa LGU Carmen, sa Provincial Social Welfare and Development Office (OPSWD), sa Office of the Provincial Veterinarian, Provincial Cooperative Development Office, Office of the Provincial Agriculturist, Provincial Legal Office, Local Government Affairs, ang Provincial Health Office, Bohol’s Education Development Center, opisyales sa Brgy. Villafuerte, ang 47th Katapatan Battalion, ug ang Opisina sa Gobernador.
Ang “Abante sa Barangay” service caravan sa Brgy. Villafuente maoy kinaunhan karong tuiga.
Mopahigayon ang PGBh og dugang nga service caravan karong tuiga sa ubang mga barangay isip kabahin sa ilang tumong nga madala ang mga serbisyong pang-gobyerno ngadto sa mga hilit nga dapit sa Probinsya.
Ang sunod nga service Caravan mahitabo sa Brgy. Campao Occidental sa Getafe karong Feb 24. (Wilson Auguis Subrio with reports PiMO)
