ANG lalawigan sa Bohol ang gipiling host sa ika-92 nga National Assembly sa League of Vice Governors of the Philippines (LVGP) karong Marso.
Mobisita sa probinsya ang 80 ka bise-gobernador alang sa tulo ka adlaw nga asembliya, nga gilangkoban sa mga seminar bahin sa mga polisiya, programa sa komunidad, ug pagbisita sa mga nailhang tourist sites sa Probinsya.
Matud pa ni Bise Gobernador Dionisio Victor Balite diin ang iyang buhatan ang mo-host sa National Assembly, oportunidad kini sa pag-promote sa Bohol isip nag-unang destinasyon sa mga turista sa nasud.
Motambong sa maong kalihokan si Administrator Arnaldo “Arnell” Ignacio sa Overseas Workers Welfare Administration (OWWA) aron ipresentar ang updates sa ilang ahensya sa mga polisiya ug programa sa Marcos Administration alang sa LGU alignment, uban ka niya ang OWWA Director nga si Gerald “Dindi” Tan, nga makighinabi sa mga bise-gobernador bahin sa gender equality ug sensitivity ug unsa kamahinungdanon kini sa mas epektibo nga pagdumala.
Ang ika-92 nga National Assembly sa LVGP mahitabo gikan Marso 2 hangtod Marso 4. (Wilson Auguis Subrio with reports PiMO)
