Ni Wilson Auguis Subrio
GISAULOG ang ika-13 nga anibersaryo sa Bohol Peace Day didto sa Anda Global Resort 1, Poblacion, Anda, kaniadtong Lunes, Pebrero 13.
Kini ang gipahibawo ni Gob. Aris Aumentado pinaagi sa iyang Facebook post sa maong adlaw.
Ang maong halangdong adlaw gitambungan sa 365 ka mga kanhing rebelde nga nibalik sa sabakan sa gobyerno kauban ang ilang mga kapikas.
Gihandom sa lalawigang Bol-anon ang pagdeklarar sa Bohol isip usa ka “insurgency-free” province kaniadtong Pebrero 11, 2010.
Nigakos sa tema nga “Kauban sa Reporma sa Pagpatunhay sa Kalinaw ug Kalamboan sa Bohol”, niingon ang gobernador nga gihatagan niini og importansya kauban ang mga Bol-anon ang pagpabilin sa kalinaw sa atong probinsya.
Gisiguro sa amahan sa probinsya nga kanunay moduyog ang Kagamhanang Probinsyal, PNP, AFP, ug mga kauban sa buhat aron magpabiling luwas ang Bohol ug katawhan gikan sa mga kasamok.
