PASTILAN ning Internet speed sa atong nasud, hinay pas iyon. Kana, matud sa kadaghanan. Matintal pud tag uyon. Apan kon buot huna-hunaon, luoy pud ang iyon. Buotan ning iyon, way libog nga binuhat sa Dios. Samtang ang Internet usa ka tinubdan sa kasamuk.
Sa pagkatinuod, ang Internet connection sa atong nasud dili lang hinay. Perte gyung hinaya. Ok ra man unta ta anang, slow but sure. Pero ang Internet dinhis ato, gakamang. Permi walay sure. Pag-syur uy. Manaa, mawa. Usa baya nas mga gisaad ni Presidente Duterte sa usa sa iyang miaging State of the Nation Address. Marcos na. Wa gihapon.
Kanus-a pa ta makat-on pag undang og tuo anang mga saad sa mga politico? Ambut kaha. Kini nga saad usa sa ubay-ubay’ng nangapusgay na sama sa hinanaling pagsumpo kuno sa illegal drugs, corruption, endo, ug uban pa.
Duna na ganiy third player sa telco industry, kanang gipanag-iyag Chinese kuno. Gitawag og Dito. Apan kay kini iya man kaha sa mga Chinese nga gamhanan, angay unta ning tawgog Doon. “Doon sa China, hindi Dito sa Pilipinas”. Wa man gihapoy ayo.
Pero sa way tiaw-tiaw, ang duha ka monopolyo (o ensaktong tawgog, duopolyo) nga Smart ug Globe wa man mahadlok sa pagsud sa Dito. Wa man moasenso ilang serbisyo. Ang balaod sa capitalismo nga gitawag og competition daw sa way epekto niining tungora.
Angay tingale, nga ang kusog ug kadasig ning kasamtangang administrasyon gamiton aron pagtuman sa iyang mga daghang saad paghimo sa bugas nga tag-20 ang kilo, paghaw-as sa katawhan gikan sa kakabus ug daghan pang mga saad.
Kita hinuon, wa ta masayud og kanus-a matuman ning mga saad, ug kanus-a moasenso ang serbisyo publiko. Og tungod kay gibati man tag kaluya, mag-ampo ta. Ang pag-ampo way sipyat. Atong iampo nga ang atong katawhan, ang kadaghanan sa mga botante, makat-on na unta pag-abli sa ilang mga mata ug hunahuna, ug dili na magpalingla sa mga propaganda bisan diin gikan, Facebook, Youtube, Tiktok o kinsa pa diha.
BOHOLINA. Niay maayong balita gikan sa atong mga higalang lokal nga mag-uuma. Duna gyuy kultura sa agrikultura. Di ba daghang tindahan dinhis ato nga naay signage nga “Bahalina from Leyte”? Morag ilang giangkon nga ang the best Bahalina gikan gyud didtong dapita. Pero dunay mga local farmers nga supak niana.
Pinaagi sa ilang pagka-mamugnaon, nagplano sila pagkakaron pagpakuyanap sa usa ka Bol-anong ilimnon nga pagatawgong, Boholina. Kini kuno usa ka improved and healthier version sa Kinutil, kombinasyon sa Bahalina, Coconut Sugar, itlog ug Sikwate. O, di ba, galaway na mo no? Unsa pay inyong dugang sugyot diha? Unsay tan-aw ninyo, piskay ba?
Matud usab ning maong mga mag-uuma: “One buko a day, keeps kidney stones away”. Tinuod ba na, Doc Alec?
