GIHIMAKAK ni Panglao Mayor Boy Arcay ang pagpahamtang og gag order sa mga kawani sa munisipyo pinaagi sa memorandum order nga gipasangil sa mga konsehal sa maong lungsod.
Si Arcay niingon nga ang memorandum nga gihagit sa mga magbabalaod sa munisipyo wala magdili sa mga municipal personnel sa pagsulti sa publiko.
Gipasabot niya nga ang maong kamanduan nagkinahanglan lang nga mangayo una sila og pagtugot sa iyang buhatan labing menos pito ka adlaw sa dili pa sila motambong sa mga komperensya, mga tigom o uban pang mga pakigpulong sama sa mga sesyon sa Sangguniang Bayan (SB).
Matod ni Arcay, ang maong lakang gituyo aron “protektahan” ang mga municipal workers nga nagreklamo nga gikasab-an atol sa mga sesyon sa SB ug nabalda sa ilang trabaho tungod sa walay pugong nga mga tawag sa pag-atubang sa legislative body. Partikular nga gipasanginlan sa chief executive si Konsehal Dennis Hora.
Usa si Hora sa nanawagan kang Arcay nga i-withdraw ang memorandum order kay nakababag sa trabaho sa lehislatura.
Wala gilimod sa magbabalaod ang pagbadlong sa usa ka empleyado sa munisipyo apan niingon nga supak kini sa mga advisors sa mayor, dili sa ulohang buhatan.
Kaniadto, si Hora miingon nga ang pag-isyu sa mando nga wala maghisgot sa bisan unsang legal nga sukaranan nga nagtugot kaniya sa pagpahamtang sa pagdili, us aka illegal.
Ang konsehal, kinsa usa ka abogado, nakamatikod usab sa “kawalay klaro” sa memorandum ilabi na sa silot sa paglapas sa bag-ong polisiya.
Sa memorandum, si Arcay nipasidaan nga kadtong makalapas sa maong kamandoan, silotan sa gilayon.
Samtang si Konsehal JR Rodriguez nga kaalyado ni Arcay niingon nga kontra produktibo ang maong polisiya ug makapahinay sa pagpatuman sa mga gimbuhaton sa SB.
Gitataw ni Rodriguez nga human gipasaka ang mga reklamo batok sa kamanduan, ang buhatan sa mayor niuyon nga putlon ang pito ka adlaw nga kinahanglanon.
Kini dugang nakaaghat sa mga konsehal sa pagkuwestiyon sa bag-ong polisiya. (RTB)
