NIPASAKA og apela ang nag-inusarang private emission testing center (PETC) sa ikatulong distrito sa Department of Transportation (DOTr) nga tugotan nga makabalik sa ilang operasyon human gipasirad-an sa miaging tuig.
Matod sa hepe sa LTO Tagbilaran nga si Yvonne Auza, ang PETC nga anaa mahimutang sa Jagna adunay giingong mga kalapasan nga miresulta sa pagkasuspenso niini. Hinuon nagdumili siya sa pagbutyag sa kalapasan.
Giluwatan ni Auza ang maong pamahayag taliwala sa mga reklamo sa publiko, ilabina niadtong adunay mga transaksiyon sa buhatan sa LTO sa Garcia Hernandez, nga kinahanglang mobiyahe gawas sa ikatulong distrito aron ipa-eksamin ang ilang mga sakyanan.
Ang test sa pagbuga sa aso usa ka kinahanglanon sa pagbag-o sa rehistrasyon sa mga salakyanan nga sagad gihimo matag tuig.
Namatikdan usab ni Auza ang pagpahamtang og moratorium sa pag-abli sa bag-ong PETCs sukad sa pag-takeover ni Jose Art “Jay Art” Tugade isip hepe sa ahensya niadtong Nobiyembre sa miaging tuig.
Matod sa opisyal sa LTO, wa sila magdahom nga maghuot ang ubang PETC tungod sa pagsirado.
Iyang namatikdan nga adunay tulo ka PETC sa Tagbilaran City, usa sa Tubigon, ug usa sa Talibon.
Adunay duha usab ka private motor vehicle inspection centers o PMVICs sa Tubigon ug Tagbilaran City. (RTB)
