GISAYSAY ni first-termer Duero Mayor Al Cadorniga Ladaran Taculad nga makig-alayon sila sa National Housing Authority arun mahatagan sa desenteng panimalay ang mga myembro sa Eskaya Tribe.
Ang Eskaya naa sa mga lungsod sa Guindulman, Sierra Bullones, Pilar ug Duero.
Mao kini ang usa sa mga punto nga iyang giladlad sa iyang unang State of the Municipality Address.
Ang iyang mga development programs dunay acronym nga S.H.I.N.E – (Security and Safety), (Heritage, Culture and Tourism, ( Inter-Govermental Relations and Civil Society Partnership ), (Nutrition), ug (Economic Enterprise) .
Dugang pa niini, pagatukoron usab sa maong lungsod ang Napoleon Abueva Museum arun ma-display ang mga Obra Maestra ni Abueva.
Si Abueva, usa ka political scientist nga nahimong ika-16 ka presidente sa Unibersidad sa Pilipinas.
Niadtong 1962, gipasidunggan siya isip Ten Outstanding Young Men awardee for political science.
Dugang pa sa Mayor, moabot sa P200M infra projects ang igahin sa iyang lungsod sa tuig 2024.
Wala usab niya hingkalimti ang sektor sa panglawas. Ang ilang lungsod dunay Hematology Machine alang sa mga laboratory tests sa katawhan.
Duha ang ilang ambulansya nila nga moserbisyo alang sa katawhan kon dunay mga emergency cases.
Kahinumduman, nga bag-o lamang nihatag sa P1M AICS Fund ang Buhatan ni Sen. Ronald ” Bato” Dela Rosa.
Si Sen. Bong Go nigahin usab sa iyang pundo nga gagamit sa lungsod alang sa ilang Educational Assistance program pinaagi sa DSWD.
Mga 200 ka mga estudyante ang na grasyahan sa maong ayuda nga tag P2,000.
Sa agrikultura, Revolutionized Agriculture Program ang ilang gipanghingusgan gumikan kay ang ilang lungsod maoy Town of Veggies and Spices.
Lakip na niini, ang pagpang apod sa mga abono alang sa mga local farmers, gipangrehistro usab nila ang mga Motorized Banca samtang 341 ang nahatagan sa Tilapia Fingerlings .
Namahayag ang Inahan sa Kanunayng Panabang sa Tersiero Distrito, Congw. Alexie Besas Tutor nga dili na “sleeping municipality” ang Duero sanglit maayo man ang paglantaw ug programa sa mayor.
Awhag ni Congw. Tutor nga panahon na sa panaghiusa ug wagtangon na ang kolor sa pamolitika arun walay babag sa kalamboan.
Ang amahan sa lalawigan sa Bohol , Gob. Erico Aristotle Aumentado niduyog usab sa kasaulogan gumikan kay taga Duero man ang iyang kapikas sa kinabuhi nga si Congw Van-van Cadorna Aumentado. (Kahlil Lester O. Camba)
