DAGHAN kanato ang kulang sa pagsalig sa kaugalingon. Ang kalig-on sa atong pagsalig sa kaugalingon namugna tungod sa mga kasinati-an, nahi-aguman ug naagi-an. Adunay daghang kaguol ug kalipay nga miabot kanato, ug kini nakabilig lama sa mga kagahapon. Mga kagahapon nga maoy momugna ug mga pagduda sa atong katakos nga makalampos. Ang kalamaposan alang sa atong kaugalingon mahimong maangkon pinaagi sa pasyon ug determinasyon. Walay makamando sa tawo kon unsay iyang buhaton ug himoon subay sa maayong pamatasan ug gawi. Ang mga himo-unon mag-agad lamang gayud kanato. Kita maoy motakda sa mahitabo sa atong kinabuhi.
Matag usa kanato naglantawg kalamposan ug kalambo-an. Kini tungod sa mga panginahanglan aron mabuhi ug magpakabuhi. Ang tanang tawo adunay mga panginahanglan sibo sa ilang mga damgo ug tinguha. Apan dili tanan ang makatagamtam ug katumanan sa ilang mga pangindahay. Daghang higayon nga mosangpot kini sa mga suliran ug gumonhap nga makahatag ug kahasol sa atong pagpuyo dinhi sa kalibotan. Daghang higayon nga ang tawo mawad-an ug pagsalig sa kaugalingon. Kanunay niyang gitandi ang iyang kahimtang sa uban. Sama kanato, daghan usab ang kulang sa pagsalig sa ilang kaugalingon.
Ang kalamposan dili maangkon sa usa ka pamilok lamang. Nagkinahanglan kini ug igong panahon, paningkamot ug pag-antos. Walay laing mohimo alang kanato apan kita lamang gayud. Kon aduna kitay nahunahuna-ang mga pamaagi, angay lamang nga atong buhaton sa tinud-anay ug walay puas nga pagsunod ug pagpunay. Adunay mga tawo nga malamposon sa ilang kinabuhi ug daghan usab ang nangapakyas. Kon atong tun-an ug tuki-on ang ilang kinabuhi, aduna silay mga taras ug kinaiya nga maoy hinungdan sa dili managsama nilang kahimtang. Ang ilang kadaugan ug kalamposan wala mag-agad sa ilang utok, apan sa kadak-on sa ilang panghunahuna.
Ang mga nagmalamposon adunay pihong tumong nga pagabuhaton. Nasayod sila kon unsa ang ilang himoon. Dili igo ang kahibalo sa ilang mga plano aron mougmad. Nasayod usab sila kon unsaon paghimo aron kini matuman ug mapatuman. Ilang gitun-an ang mga kapili-an kon adunay mga palpak nga ilang maagi-an. Ang mga kapili-an maoy mahimong basihan pagkab-ot ug tukma ug hustong mga paghukom. Ang mga nagmalamposon naglantaw ug sangpotanan. Wala ug dili sila mohunong hangtod nga sila molampos. Kanunay nilang gitun-an ang ilang kapakyasan. Giunsa nila pagdala ang kaugalingon ug panghunahuna maoy naka-ambag sa ilang pag-uswag.
