GIBUTYAG ni Bohol provincial veterinarian Dr. Stella Marie Lapiz nga gibantayan karon nga dili makasud dinhi sa lalawigan ang Avian Influenza H5N1 strain nga mas naila nga bird flu.
Kini human nakompirma didto sa Luzon ang bag-ong kaso sa bird flu diin ang Department of Agriculture (DA) pinaagi sa Bureau of Animal Industry (BAI), nakakuha og positive laboratory result sa gipaubos sa test nga mga apektadong bird products sa lalawigan sa Bulacan ug Pampanga.
Matod ni Lapiz nga lakip sa mga lakang nga gihimo dinhi sa Bohol ang pagpahigayon og surveillance sa mga migratory birds.
Gawas niini, duna say gihimong border control ug pagsusi sa mga moabot dinhi sa Bohol nga mga manok, piso, balot o itlog nga gikan sa Luzon diin kuyog niini ang gikinahanglang requirements nga magmatuod nga kini gikan sa rehistrado nga farm nga regular nga nagpaubos sa avian influenza testing.
Samtang nasayran nga ang Negros Occidental mipatuman sa temporary total ban sa tanang live domestic and wild birds, ingon man ang mga produkto niini gikan sa tanang mga rehiyon sa nasod taliwa sa hulga sa bird flu aron pagseguro sa safety sa P8-billion poultry industry sa maong lalawigan. (RTB)
