KARONG panahon sa pandemya kinahanglang doble ang pag-amping sa panglawas ilabi na sa kabataan aron malayo sa mga sakit.
Busa ang City Health Office sa Tagbilaran nabalaka sa pagtaas unya sa kaso sa tipdas ug polio sa atong nasod.
Sigon ni City Health Officer Dr. Jeah Pondoc nga dili sila ganahan nga aduna pa’y laing epidemya nga muabot sa komunidad.
Sumala niini nga mas maglisod og maayo kon magka-outbreak sa tipdas ug polio ang siyudad ning panahon sa COVID-19 pandemic.
Subay niini, gi-awhag sa opisyal ang tanang mga ginikanan sa syudad ug mga nag-atiman og bata nga wala pa’y lima ka tuig paubos nga makighiusa sa supplemental immunization activity ug pabakunahan ang mga anak panagang sa tipdas, rubella o dalap ug polio. (RTB)
