GIAWHAG karon sa ikaduhang labing-labaw nga opisyal sa Bohol ang mga barangay kapitan nga kinahanglan suportahan ang kalihokan sa Sangguniang Kabataan ug dili lisod-lisoron ang pagkuha sa annual budget niini.
Suma pa ni bise-gobernador Dionisio Victor Balite, PhD nga andam ang iyang buhatan nga moabag ngadto sa SK Officials nga maglisod og kuha sa ilang tinuig nga budget.
“Naa ta’y nadunggan niana nga mga istorya. Puwede ta motabang nila pinaagi sa pagpadala nato og suwat ngadto sa DILG aron mahimoan og aksyon,” matud pa ni Balite ning pamantalaan.
Dugang ni Balite nga independente ang SK ug aduna kini kaugalingong panudlanan diin ubos sa guidelines, ang 10 porsyento sa tinuig nga general fund sa barangay ibalhin gyud sa panudlanan SK.
Matud pa niya nga importante ang pagtinabangay sa barangay officials ug SK Officials sanglit susama sila og tumong ug kini mao ang panerbisyo sa katawhan.
Nasayran nga nakabukas na og kaugalingong account ang mga SK offcials sa 1,109 ka barangay sa Bohol.
Kun ugaling dunay mga personal nga panagbangi ang opisyales sa barangay ug SK, kinahanglan kini nga ipadaplin aron dili maapektohan ang pag-alagad ngadto sa katawhan.
Samtang gihangop sa bise-gobernador ang mga barangay nga naghatag gyud og mga programa ngadto sa kabatan-onan. (RTB)
