NISUGYOT ang usa ka miyembro sa Sangguniang Panlalawigan (SP) sa usa ka ordinansa nga naglimite sa volume sa sound system nga gamiton sa mga disco sa barangay, konsyerto ug uban pang kalihokan.
Si Bokal Venzencio Arcamo sa unang distrito nihimo sa proposal karong bag-o taliwala sa mga reklamo batok sa pagpahigayon og disco sa Barangay Lapaz, Cortes sa miaging mga semana diin madungog ang kusog nga party music sa mga silingang lokalidad lakip na sa Tagbilaran City.
Matod ni Arcamo, ang kusog nga musika dili lang makadaot sa dunggan kon dili makadaot usab sa mga adunay sakit sa kasingkasing.
Sumala sa usa ka bag-ong pagtuon gikan sa Mainz University Medical Center sa Alemanya, ang kanunay nga pagkaladlad sa kusog nga musika mahimong hinungdan sa atrial fibrillation.
Gisugyot sa pagtuon nga ang pagtaas sa gidaghanon sa kasaba makapawala sa ritmo sa kasingkasing. Kining dili regular nga pagpitik sa kasingkasing mahimong mosangpot sa pag-ulbo sa dugo, stroke ug bisan sa pagkapakyas pagpitik sa kasingkasing.
Ang gisugyot nga lakang ni Arcamo gi-refer sa Committee on Health sa SP nga mokonsulta sa mga doktor aron matino ang decibel nga maisip nga makadaot sa dunggan.
Si Arcamo niingon nga ang mga establisemento nga nagrenta og sound system imbitahon usab aron makakuha sa ilang input sa decibel limit alang sa publikong mga kalihukan.
Sa miaging mga semana, nag-viral sa social media ang mga reklamo batok sa diskohan sa lungsod sa Cortes.
Ang mga lumulupyo sa Tagbilaran City apil na sa mga barangay sa Manga, Ubujan ug Taloto nga duol sa Cortes nipahungaw sa mga komento batok sa kusog nga musika.
Gitataw ni Arcamo nga aduna nay ordinansa ang Tagbilaran City nga nag-regulate sa paggamit sa sound system apan wala kini mapahamtang sa kagamhanan sa dakbayan sanglit ang musika naggikan sa Cortes nga wala sa ilang hurisdiksiyon. (RTB)
