ANG KABATAN-ONAN ang lagmit mo-reak niini ilabina ang mga “bag-ong tubo” nga maniskuhay.
Ako, kadaghang higayon nga nisulod ko og disco-han bisan dili hinayaw — ganahan lang ko motan-aw sa mga tawo nga manayaw. Usahay mosayaw depende sa tukar.
Apan angkunon nako nga ana-a gayuy negatibong epekto ang sobra ra kakusog nga tingog sa sound system sa atong panglawas.
Anaay mga panahon nga maduol ko mismo sa nahimutangan sa mga sound system, mura’g mobuto ang akong dughan, ug kini mao usab ang nabati sa uban.
Ang delikado kon anaay sakit sa kasing-kasing kay apeke gayud.
Ang Sangguniang Panlalawigan (SP) sa Bohol anaay giumol nga balaudnon (aron mahimong Ordinansa) nga buot limitahan ang kakusgon o “volume” sa tukar o music sa mga disco, concert ug ubang kalingawan nga mogamit og sound system.
Si Provincial Board Member Venzencio Arcamo nihimo sa maong proposal kaniadtong Enero 31 sa niaging buwan tungod sa daghang reklamo sa gihimong disco sa Barangay Lapaz, lungsod sa Cortes sa niaging semana diin nadungog ang kusog nga tukar sa mga silingang lungsod lakip na sa siyudad sa Tagbilaran.
Matud ni Arcamo, ang kusog nga tukar dili lang makadaot sa mga dalunggan apan kuyaw ilabina sa mga anaay sakit sa kasing-kasing.
“When the music is too loud it is no longer enjoyable but uncomfortable. When I consulted a doctor, I was told that it will affect your health, particularly people with heart ailment,” matud sa maong magbabalaod.
Anaay bag-ong pagtuon nga nag-ingon nga ang kusog nga tukar makahatag og dili normal nga pagpitik sa kasing-kasing nga mamahimong hinungdan sa blood clots, stroke ug heart failure, suma sa taho nga nigawas.
Ang giplanong lakang gidunyang na sa Committee on Health sa SP aron mahatagan og igong pagtagad.
Sa social media, daghang mga netizens ang nipadayag sa ilang pagpabor sa maong lakang nga pahinayan ang kakusgon sa tukar sa mga disco, concert ug ubang kalingawan.
Apan anaay niingon nga unsaon man pagpahinay niini ilabina sa disco diin magsadya ug maglipay ang mga tawo ilabina kon pista?
Anaay nisugyot usab nga mas maayo nga dili ang kakusgon sa tukar ang pahinayan apan ang oras sa disco maoy panub-an.
Kasagaran man g’yud moabot og kadlawon ang mga disco kon walay gubot. Himuon na lang kuno nga kutob alas 12 o alas 11 aron dili ma-argabyado og ayo ang mga natog na.
Ni-rason pud ang uban nga lisod pugngan ang mga tawo sa ilang kalipay ilawom sa kusog nga tukar ilabina nalaming og duha ka tuig nga walay mga kalingawan tungod sa pandemya sa COVID-19.
Manghinaot na lang ta nga makahimo og maayong lakang ang atong mga magbabalaod sa SP diin mauyonan usab sa mga maniskuhay o katawhang Bol-anon.
Pahinumdom lang pud sa mga maniskuhay ilabina sa mga batan-on nga ang tanang sobra sama sa inom, kuwang sa tog ug sobra ka kusog nga tukar, dili makaayo sa atong panglawas.
Kining lindog: ‘Tingog sa Kabatan-onan’, abli sa inyong mga sugyot ug komento. Mamahimo kana ninyong mapaabot pinaagi niining akong numero 09638753562 o sa Facebook ug Messenger account: Wilson Auguis Subrio.
Modawat lamang og seryoso ug dili binuang. Mag-amping kita, mga Bol-anon!
