PUEDE. Pero sa atong kaugalingon, sa atong mga anak, ug mga estudyante. Ngano man?
Sa wa pa mahitabo kining covid-19 daghan na kog nailhan ug nadunggan nga mga ginikanan nga nagproblema sa ilang mga anak kay nahungog sa video ug computer games. Di na mosud og klase kay tua gayampungad sa computer games. Tuas Internet Café.
Lisud suguon. Kusog motubag-tubag. Saputon kung dili maka-online. Pipila lamang kini sa mga simtomas nga ang atong mga kabataan na-adik na sa computer ug video games. Ako mismo nakasaksi niini tungod kay sa miaging katuigan diin wala pay covid-19 matag higayon nga mawala ang Internet connection sa among bay, modalikyat kog Internet Café. Kasagaran puno kini sa mga menor de edad nga nanggiduwa og computer video games. Banha kaayo. Bastos pa gyud og mga sinultian.
Tingale wa pud mahibaw-i sa mga bata mismo ug ilang mga ginikanan, ug bisan ilang mga teachers, nga kining ilang sigeg tan-awon o dulaon nga mga war video games mao kini ang gigamit sa US Army aron pag-train sa ilang mga sundalo nga dili na bati-on og konsensya sa ilang pagpamatay sa ilang mga kaaway. Gigamitan kini sa mga binag-ong teknolohiya ug manipulasyon sa hunahuna sa tawo. Busa, mao usab kini ang mahimong resulta ug dangatan sa atong kabataan.
Mao usab kini ang resulta sa mga pagtuon didto sa Estados Unidos. Kadtong mga batan-on nga nagdala og mga high-powered firearms ug girakrakan ang ilang mga classmates sa eskwelahan pulos namatud-an nga sigeg dula sa ingon-ini nga mga duwa sa computer games.
Nan, karon, unsaon na man ni nga ang sistema sa atong edukasyon mismo manginahanglan na mag online nga pagtuon. Dili tingale 100% percent pero naa gyuy online session matag-karon-ug-unya. Imbis nga atong ipahilayo ang atong kabataan sa Internet ug video games gipugos na man hinuon ta sa bag-ong sistema nga dad-on kini sa atong mga panimalay mismo.
Ang akong nakita nga medyos niini mao gayud ang hugot nga pag-monitor sa mga pahina sa Internet nga pag-ablihan sa atong mga kabataan. Full monitoring. Kinahanglang censored ang mga pahina nga mahimo nilang ablihan. Kay kon dili nato kini buhaton, daku kaayo ang posibilidad nga mahimo kining laing pandemia sa atong katilingban.
Angay gayud nato kining bantayan. Ang mga boluntaryong psychologists kinsa mitanyag sa ilang libreng serbisyo tungod sa mga suliran sa depression, suicide ug susamang mga problema angay usab nga mohatag og igung pagtagad niini. Usa gayud kini ka dakung hulga sa atong kabataan ilabi na karon nga exposed na kaayo sa Internet ang tanang kabataaan sa bag-ong sistema sa edukasyon.
