NASAKMIT ganinang sayong gabie sa kapolisan pinaagi sa buy-bust ang gidiling drugas, gituohang shabu, nga gibana-banang 1.25 kilos nga nagkantidad og P8.5 milyones, matud sa spot report nga gipadala ni PLT Thomas Zen Cheung, officer in charge sa kapolisan sa Dauis, Bohol.
Ang suspek nga naaresto nailhan nga si John Albert Quiza Iter, alias John-john, 27, minyo, molupyo sa purok 4, Barangay Dao, Tagbilaran City ug handler sa manokan.
Ang suspek nga na buybust sa may purok 5, Poblacion, lungsod sa Dauis pasado alas siete sa gabie, mag-atubang sa kasong kalapasan sa sections 5 ug 11 article II sa Comprehensive Dangerous Drugs Act o R. A. 9165.
Sa pasiunang report, ang nasakmit nga “shabu” nga isulod sa sudlanan sa ‘tsa’ o chnese tea ang marka niini.
Sa niaging gabie (Enero 23), na-buybust usab didto sa barangay Songculan, Daus, Bohol ang gidudahang shabu nga nagkantidad sa P1.3 milyones.
Si Gob Aris Aumentado, kinsa bag-o pa lang nahidangat gikan sa kaulohan, misaksi sa pag-inventory sa nasakmit nga drugas uban kang Dauis Mayor Roman Bullen ug police director Col. Lorenzo Batuan.
Matud sa gobernador sa pakighinabi sa media nga maghatag ang iyang administrasyon sa “cash reward” kon kinsa ang makahatag sa eksaktong kasayuran batok sa nagpayohot sa gidilig drugas sa Bohol.
Siya midugang nga magpalit sa mga “sniffing dogs” ang probinsya aron sa pasusi gyud sa illegal drugs nga mihasi na usab, labina kay daghan nang mga sakyanan nga mahidangat sa Bohol nga di kaayo masusi.
Matud sa gobenador nga, uban kapolisan ug sa Philippine Drugs Enforcement Agency (PDEA) ilang ayagon gyud pag-ayo ang sitwasyon sa gidudahang illegal drugs.
Sa iyang kabahin usab, si Mayor Bullen nagkanayon ngadto sa media nga maka-alarma na ang pagdagsang sa illegal drugs sa Dauis.
Apan, ang kapolisan, pinangulohan ni Cheung naninguha gyud nga mapakgang ang illegal drugs sa Dauis, matud sa mayor.
Sa iyang kabahin usab, si Col. Batuan nagkanayon nga wala na sa Bohol ang gika-intapan nga mga “ninja cops” (sumala sa listahan nila) nga gituohang mao ang nagprotehir sa maong negosyo human gisukna siya sa gobernador. (DCR/rvo)
