NANAWAGAN ang Partido Manggagawa (PM) og usbaw sa suholan sa tanang mamumuo sa tibuok nasud aron masolusyonan ang nagkataas nga insidente sa kagutom ug kakabus base sa nigawas nga resulta sa Social Weather Station survey.
Nakita sa bag-ohay lang gipagawas nga resulta sa survey nga niadtong Disyembre 2022, nisaka og 11.8% sa populasyon sa nasud ang nagutman o tulo ka milyong pamilya gikan sa 11.3% niadtong Oktobre 2022 o 2.89 milyon ka pamilya.
Ang mao gihapong survey nga misaka sab ngadto sa 51 porsiyento gikan sa 49 porsiyento o 12.9 milyon ka pamilya ang miingon nga kabus sila, misaka kini og 300 mil gikan sa uwahing survey niana gihapong mga bulana.
Nakita sa PM nga ang babag aron makuhakuhaan kining mga insidentiha mao ang mga negosyante nga padayong nagmagahi pagbati sa ilang mga empleyado ug ang pagpakabuta-bungol sa gobiyerno sa yangungo sa mga mamumuo nga naglisod.
Miingon ang PM nga base sa gihimong research sa International Labor Organization (ILO), ang pag-usbaw sa suholan sa empleyado gamay ra gyud kaayo og epekto o dili makapasamot sa gidaghanon sa walay trabaho.
Matud pa nga ang bag-ong usabw sa minimum wage karon sa mga lalawigan nga sakop sa Central Visayas ang nawala ang bili pagsulod sa bulan sa Disyembre 2022 nunot sa padayong pagsaka karon sa presyo sa palaliton. (RTB)
