USA ka opisyal sa Land Transportation Office (LTO) nipadayag og pagkamalaumon nga ang gisugyot nga pag-abli sa extension office sa Ubay makatabang sa pag-decongest sa ubang mga sanga sa ahensya sa tibuok probinsya.
Matod sa hepe sa LTO Tagbilaran nga si Yvonne Auza, ang pagtukod og extension office makahatag og kasayon sa publiko ug makapaluag sa kahuot sa ubang mga buhatan sama sa dakbayan.
Siya niingon nga daghang mga residente sa Ubay ug silingang mga lungsod ang nagbiyahe pa sa Tagbilaran aron maproseso ang ilang mga lisensya ug rehistrasyon sa mga sakyanan.
“Ma decongest gyud ang ubang mga opisina, labina sa amoa kay kadtong mga taga Ubay dili na sila mawala anhi kay kasagaran sa mga taga Ubay mo transact gihapon sa Tagbilaran,” matod ni Auza.
Niadtong Nobiyembre sa miaging tuig, gisang-at ni Second District Rep. Vanessa Aumentado ang House Bill 5951 nga nagtinguha nga magtukod ug LTO extension office sa Ubay.
Hinuon namatikdan ni Aumentado nga madugay pa una matukod ang opisina tungod kay ang gisugyot nga lakang padayong gipaubos sa committee-level deliberations sa House of Representatives.
“Unang reading pa so pasabot naa pay second and third unya after this usalang pa sa Plenary then hoping ma approve. Unya sa Senado. So taas taas nga processo pero kung sugdan og lihok karon walay kumu, aron duna tay mapa-abot,” matod ni Aumentado.
Matod ni Auza, ang mga indibiduwal mahimong makakuha sa ilang mga lisensya ug rehistrasyon sa mga sakyanan sa bisan asa nga sanga o opisina sa LTO bisan unsa pa ang ilang pinuy-anan.
Matod niya walay lagda nga nagdili sa mga residente sa usa ka lokalidad nga makigtransaksyon sa mga sanga sa LTO sa ubang mga lungsod o siyudad.
“Pohon og naa na at least ma decongest na ang mga taw sa Talibon, sa Garcia ug Tagbilaran kay wa may rule nga bawal ang Tagbilaran nga mo pa rehistro sa Garcia or sa Talibon. So at least naay dugang choices ang mga taw,” matod ni Auza. (RTB)
