GIKLARO ni kanhi Cooperative Development Authority Administrator Benjie Oliva nga kon mahimo dunay sakto nga impormasyon ang katawhan kabahin sa lokasyon sa Makapiko Bridge.
Iyang giklaro nga nag-konektar kini sa Brgy. Rizal didto sa Lungsod sa Batuan ug Brgy. Mahayag Norte didto sa Lungsod sa Catigbian; dili ang Hanopol sa Balilihan.
Dugang pa niya nga ang Balilihan-Hanopol-Batuan Road niagi sa 3 pa ka mga barangay sa Catigbian nga mao ang Hagbuaya, Mahayag Sur ug Mahayag Norte.
“ Kon tan-awon sa old map sa Kapitol, ang pikas end sa tulay nga giingong naa sa Brgy. Rizal, Batuan sakop pa sa Catigbian. Wala lang gi-contest sa lungsod ang boundary dispute”, suma pa ni Oliva
Giawhag pa ni Oliva ang mga municipal, provincial ug bisan ang mga national officials nga maghimo sa mga “corrections” mahitungod sa pag-ila sa Catigbian.
Kahinumduman nga nahesgutan na usab sa social media ang Makapiko Bridge gumikan kay matud pa delikado nga estado niini apan sa gihulagway kini ni Batuan Mayor Dodo Jumawid ug mga inhinyero sa DPWH nga “passable” kini.(Kahlil Lester O. Camba)
