GIPIRMAHAN na ni Gov. Art Yap ang Bohol Medical Scholarship Program ubos sa Provincial Ordinance No. 2022-022 nga magtukod sa maong bag-o nga programa sa kagamhanang probinsyal.
Puno sa emosyon ug dakong kalipay sa gobernador nga nakig-atubang sa mga medical frontliners atol sa pagpirma sa bag-ong ordinansa nga magsuporta sa mga kabatan-onang Bol-anon nga moeskwela sa pagka doktor.
Matud pa ni Gov. Yap, aron nga adunay malungtaron nga sistema sa panglawas sa lalawigan, angayan nga ibalanse ang preventive ug curative nga side ug kinahanglan nga matubag ang mga gaps.
Dako ang pasalamat sa gobernador ni Bise-Gobernador Rene Relampagos ug sa mga Board Members sa suporta sa maong programa.
Samtang ang Bohol Medical Society (BMS) mapasigarbuhon ug mapasalamaton sa liderato ni Yap sa paghimo sa maong programa aron maka-produce ang Bohol ug bag-ong mga doktor.
Matod pa ni Dr. Mardy Fortich (President, Bohol Medical Society), nga ang mga doctor sa Bohol walay kabutangan sa kalipay nga mamahimo na gyod kining programa.
Gawas pa niini, dako usab ang kalipay ni Dr. Yul Lopez (BIATF Medical Cluster-Head) nga hugot kaayo ang suporta ni Yap sa programa alang sa kahimsog sa katawhan sa Bohol. (RTB)
