SA Marso 1, mikabat na sa 20 ka lungsod sa Bohol ang wala nay aktibong kaso sa coronavirus disease (COVID-19).
Kining mga lungsora ang Baclayon, Getafe, Cortes, Dauis, Sierra Bullones, Garcia Hernandez, Danao, Corella, Candijay, Buenavista, DImiao, Tubigon, Sagbayan, Loay, Sikatuna, Balilihan, Mabini, Pres. Carlos P. Garcia, Loon ug Duero.
Subay sa taho sa Bohol Inter-Agency task Force on the Management of Emerging Infectious Diseases sa iyang Daily COVID cases tracking sa Bohol, napakita usab nga gawas sa 20 ka lungsod nga wala nay kaso sa COVID, may laing napulo ug duha ka lungsod nga may tagsa na lamang ka kaso.
May tag usa ka kaso sa COVID ang mga kalungsuran sa Loboc, San Isidro, Sevilla, Dagohoy, Panglao, San Miguel, Ubay, Bien Unido, Batuan, Guindulman, Lila ug Pilar.
Gani, sulod sa usa ka semana, napulihan na ang Tagbilaran City isip lugar sa Bohol nga permi gyud nga nanguna sa kadaghanon sa kaso sa coronavirus disease (COVID) dinhi sa Bohol.
Sulod sa kapin sa usa ka tuig ug walo ka buwan, nanguna ang Tagbilaran City sa talaan sa COVID, sanglit dinhi ang han-okanan sa mga katawhan sa tibuok Bohol ug mismo ang lugar nga may labing daghang populasyon.
Apan niining milabay nga semana, dihang gikataho ang dinagko nga pagkunhod sa kaso sa sakit nga hilabihan ka mananakod, napakunhod sa Tagbilaran ang iyang mga aktibong kaso ug bisan na gani sa bag-ong nakompirma nga kaso.
Sa mi-aging semana, miabut ang higayon nga napulihan ang Tagbilaran sa Inabanga sa kadaghanon sa may aktibong kaso, ug sa Marso 1, nanguna na ang Trinidad, bisan pa kon 7 na lang ang kaso niini.
Ang Tagbilaran may lima na lang usab ka aktibong kaso, sama sa Bilar, samtang may tag tulo ka kaso sa COVID ang Carmen, Inabanga, Clarin, Talibon, ug Antequera.
May tag duha usab ka kaso sa COVID ang gimonitor didto sa mga kalungsuran sa Maribojoc, Alburquerque, Jagna, Catigbian, Calape, Anda, Alicia, ug Valencia. (RAHC/PIA7 Bohol)
