MOPAHIGAYON na usab ang Kagamhanan sa lalawigan sa Bohol pinaagi sa Office of the Provincial Agriculturist (OPA) sa Ubi Festival karong Enero 26-30, 2023 sa Old City Airport, Cogon, Tagbilaran City.
Ang 5-ka adlaw nga kalihukan maoy tinuig nga aktibidad sa kagamhanang probinsyal nga nagpakita sa lain-laing klase sa Ubi sama sa: Baligonhon, Binanag, Gimnay, Binato, Iniling, Tam-isan, Kabus-ok, ug ang sikat nga Kinampay.
Sumala pa ni Gertrudes S. Fuentes, Chief- Crops and Productivity Division – OPA kinsa mao usab ang focal person sa festival nga ang kalihukan sugdan pinaagi sa motorcade contest sa ala 1:00 sa hapon sa Enero 26, 2023 nga moagi gikan sa Capitol Grounds – New Capitol Site Road – Hangos Street – J. A. Clarin St. -City Hall Grounds – Calceta St.- St. Jude Hospital – CPG Avenue – City Airport Road – paubos sa venue para sa opening program.
Sa pagbukas nga programa, si Gobernador Erico Aristotle C. Aumentado mohatag sa iyang makapadasig nga mensahe samtang ang tulo ka magbabalaod Edgar M. Chatto (1st District), Maria Vanessa C. Aumentado (2nd Dist.) ug Kristine Alexie B. Tutor (3rd Dist.), Dir. Joel A. Elumba (OIC-Regional Executive Director, DA-7) ug Dr, Gracia F. Arado (OIC-Center Director, ATI-7) mohatag sa ilang mga mensahe sa suporta samtang si Bise-Gobernador Dionisio Victor A. Balite mohatag sa iyang welcome message human si Dr. Larry M. Pamugas (Acting Provincial Agriculturist) mupaila sa mga bisita ug mga partisipante.
Human sa paghatag ni Aumentado sa iyang makapadasig nga mensahe, pangunahan niya ang pag-turn-over sa mga materyales sa pagpananom sa ubi ug mga semilya sa prutas ngadto sa mga benepisyaryo, pag-turn-over sa RPC ngadto sa bag-ong partner nga organisasyon sa mag-uuma (PIWARDEP), ug ang pagputol sa ribbon ug pag-abli sa mga exhibit.
Sama sa naandan, ang festival mu-highlight sa lain-laing contest nga salmotan sa mga partisipante nga gikan sa mga munisipyo nga adunay Ubi display sa mga booth nga ilang tukoron sa Old City Airport nga himuon sa ikaduhang adlaw (Ene. 27, 2023).
Ang mga sangka nga adunay premyo nga nakataya mao ang mga musunod: Most Participative LGU, Pinaka Contest, Balak Contest, Jingle Contest, OPM Singing Contest (Female Category), OPM Singing Contest (Male Category), Kuradang Contest (Classical not Modern Kuradang), Cook- Off ug ang Motorcade.
Sa tanang sangka, Cook-Off Contest ra ang himuon sa ikatulong adlaw nga ipahigayon sa Bohol Tourism Office nga adunay product sampling gikan sa Destileria Barako.
Ang awarding sa mga mananaog gikan sa lain-laing contest ug ang pag-ila sa mga partisipanteng LGUs himuon sa ikalimang adlaw (Ene. 30) diin si Gov. Aumentado maoy mangulo sa kalihokan.
Sa culmination program usab sa Ubi Festival, makadawat sa ilang mga awards ug recognition ang mga mananaug sa 22 ka lain-laing kategorya sa Suhid sa Malampusong Mag-uumang Bol-anon 2022 ug ang mga assisting technician niini.
Ang 22nd Ubi Festival maoy unang festival sa administrasyon ni Gov. Aumentado ug Vice-Gov. Victor Balite nga nagtumong sa paghatag ug pasidungog ug pag-ila sa mga Boholano nga mag-uuma ug mangingisda nga mitabang sa agrikultural nga paningkamot sa kagamhanang probinsiyal. (RTB)
