LOAY, Bohol — Gibandera ni Loay, Bohol Mayor Atty. Hilario “Lahar” L. Ayuban ang paspas nga aksyon sa iyang administrasyon panahon sa mga kalamidad atol sa iyang 2023 State of Municipality Address (SOMA), nga natunong usab sa iyang adlaw’ng natawhan, Enero 16.
Nikabat sa P3,093,539.40 ang kantidad sa mga donasyon nga nadawat sa Lokal nga Pangagamhanan apil na ang $800. Walay labot pa niini ang mga in-kind donations sama sa mga sinakong semento, pagkaon, Generator sets ug GI Sheets.
Dakong hagit ang nahitabong pagkahugno sa Clarin Bridge niadtong Abril 27, 2022 kon diin 18 ka mga sakyanan ang nahagbong sa suba, 22 ka mga pasahero nga 18 lamang ang naluwas.
Mapasalamaton si Mayor Ayuban sa mga niboluntaryo nga mas mopaspas pa ang retrieval operations.
Bisan pa niini, wala natandog ang mayor gumikan sa hugot nga pakig-alayon sa Sangguniang Bayan nga gipangulohan ni Bise Mayor Rodrigo “Janjan” Cubarol, ubay-ubay nga mga proyekto ang nahimo.
Nag-una niini ang pagpanindot sa Merkado Publiko sa Loay, ang mga gipanggtukod nga Evacuation Centers ug mga Multi-Purpose Buildings nga nagamit na sa mga kabarangayan.
Namahayag ang mayor nga ang pagpalambo sa panubig sa ilang lungsod ang usa sa mga nahimong dakong hagit sa iyang pangagamhanan.
Sa tuig 2022, ang Loay dunay Annual Budget nga P124,603,493; P113,119,134 niini ang National Tax Allocation Share samtang P11,484,359 ang local income sa lungsod.
Ang Merkado Publiko sa maong lungsod gipundohan sa P20M gikan ni Congw. Alexie Tutor, P5M kang Sen. Bong Go, ug P11M gikan sa Public Bidding ug Local Funds pinaagi sa pagpaningkamot sa SB.
Anaay 11 ka mga stalls ang gipangtukod lakip na ang Bagsakan Center nga “on-going” ang construction.
Wala usab kalimte ang mga MEGA-infrastructure projects nga gikan sa pundo ni Congw. Tutor.
Nag-una niini ang P50M Himontagon Hills, Botoc Occidental-Las Salinas Norte Farm-to-Market Road, P40M Tangcasan Sur-Tangcasan Norte Farm-to-Market road ug P7.5 Convergence Road sa Hinawanan-Concepcion Road.
Nadugang ang pipila ka mga Farm-to-Market Roads nga gipundohan sa National nga pangagamhanan pinaagi sa LGSF-FALGU.
P5M ang alang sa Bonbon FMR, P5M sa Las Salinas Norte Road ug apil na nga nahangyo sa LGU Loay ang kontraktor sa Clarin Bridge nga ayuhon ang kalsada atubangan sa Clarin Ancestral House nga libre.
Nagahinan ang mga barangay sa Loay sa tag P500,000; 13 ka mga barangay ang mipili sa mga Road Concreting projects.
Natukuran usab sa mga covered court ang Brgy. Poblacion Ibabao, Brgy. Alegria Sur ug Evacuation Center sa Botoc Occidental nga kantidad P33M.
NIBILIB SI CONGW. TUTOR
“Lahi si Mayor Lahar Ayuban. Dunay originality, dili copycat,” pamahayag pa ni Congw. Tutor.
Ang Balay-Tinabangay nga nitatak sa mga kasingkasing sa katawhan, ang usa sa mga nakapatandog sa kongresista.
Sa Balay- Tinabangay Odette Edition nga gisugdan niadtong Enero 16, niabot na sa 146 ka mga totally-damaged nga panimalay ang natukod.
Sa edukasyon, dunay mga scholarship grants alang sa mga estudyante ug ang “LIBRENG Sakay sa ONE Loay” nga nag-inusara sa tibuok Bohol.
“Bahala’g ginagmay, basta magka-angay”, saysay pa ni Mayor Ayuban.
Samtang malaumon si Mayor Lahar nga ang tuig 2023 maghatag og daghang grasya sa ilang lungsod ug sa mga Loaynon. (Wilson Auguis Subrio with reports Khalil Lester Camba)
