GUMIKAN kay ania gihapon ang COVID-19, gipahinumduman sa ikaduhang labing-labaw nga opisyal sa Bohol ang katawhan nga motambong sa mga selebrasyon sa kapistahan ni Senior Santo Niño nga magpabilin nga magmabinantayon taliwala sa kamaya sa pagselebrar sa kalihukan.
Lakip sa giawhag ni bise-gobernador Victor Balite mao ang pagsul-ob gihapon og face mask ug kun mahimo likayan ang crowded areas kun ang mga lugar nga dagsaan sa mga tawo.
Gidasig usab ni Balite ang kanunay nga pagpanghugas sa kamot apil sa ubang preventive measures aron paglikay sa COVID-19 ug ubang matang sa sakit.
Kadtong makasinate ug dili maayong kondisyon sa panglawas human mitambong sa Sinulog street dancing sa mga lunsgod sa Bohol nga nagsaulog sa kapistahan ni Senor Santo Nino, ang gihangyo sa bise-gobernador nga mo-isolate gilayon aron malikayn ang pagtakod sa sakit.
Gipasabot ni Balite nga ilabi na kun makasinate og hilanat, kakapoy sa lawas, pagkawagtang sa gana sa pagkaon ingon man sa pagkawala sa panimaho ug ang pagsakit sa tutunlan.
Hinuon gitataw sa opisyal nga sa pagkakaron aduna lay diyutay nga natala sa kaso sa COVID-19 sa tibook nasud. (RTB)
