KON kinsa pa ang naglisod, maglisod og samot. Ug kon kinsa ang dato, modato og samot.
Mao kini ang reyalidad sa atong katilingban, sauna ug hangtud sa kasamtangan.
Ana-a sa P600-800 ang kilo sa bombay karon sa Pilipinas. Mao na’y pinakamahal siguro sa tibuok kalibutan.
Niining bag-o lang, nahimong unod sa balita ang 10 ka mga crew sa Philippine Airlines (PAL) nga nagdala og pasalubong nga 30 ka kilos nga bombay ug mga prutas nga gikan sa gawas sa nasud.
Gidakop sa taga-Bureau of Customs (BOC) ang mga flight attendant ug ang ilang mga dalang bombay ug prutas.
Sa hearing sa Senado, gibanatan ni Sen. Raffy Tulfo ang taga-BOC. Ug nangatarungan nga ang mga smugglers unta sa bombay maoy dakpon.
Gi-rason sa BOC nga walay permit gikan sa hingtungdang ahensya kon diin gikan ang maong mga bombay ug prutas.
Ang mga senador ug mga mag-uuma nikompronta usab sa Department of Agriculture (DA) tungod sa krisis sa bombay ug ang ‘poor planning’ sa ahensya aron masolusyon ang maong problema.
Apan ang mas baho pa nga isyu kaysa nangalata nga mga bombay kay gipangtaguan sa mga negosyanteng mapahimuslan sa panahon, mao ang barato kaayong palit sa bombay gikan sa lokal nga mga mag-uuma: ana-a lang sa P8-15 ang matag kilo. Tabla pa’y gipangayo.
Mao kana ang nasinati sa mga mag-uuma sa Occidental Mindoro nga napugos sa pagbaligya sa ilang bombay sa P8/kilo (ubos) ug P15/kilo isip maoy taas na nila nga baligya.
Niingon ang maong mga mag-uuma nga ‘gipahimuslan’ sila sa mga mangumprahay og bombay.
Usa sa rason sa ilang municipal agriculturist nga si Romel Calingasan kay napugos sila og baligya sa barato nga presyo kay nahadlok nga malata ang ilang mga inani nga bombay tungod kay walay cold storage facility sa ilang probinsya.
“Kaya talaga po ganun na lang talaga kadismaya ng mga magsasaka sa amin pong lalawigan partikular sa San Jose, Occidental Mindoro dahil sobrang taas po ang naging presyo ng sibuyas. Sobrang pinagsamantalahan po ang presyo ng sibuyas,” matud ni Calingasan sa hearing sa Senado.
“Sa DA, hindi niyo ba identified kung sino ang mga middleman na pinagbentahan ng P6 to P15 na ngayon umaabot ng P600 ang benta? Dapat ang mga middleman na yun ay kasuhan?” matud ni Sen. Tulfo ngadto sa taga-DA.
Si Sen. Grace Poe niingon panahon na aron magbutang og permanenteng kalihim sa maong ahensya nga motutok gayud niini.
Una ng gisaway si Presidente Bongbong Marcos Jr. kinsa mao usab ang kalihim sa DA tungod sa walay aksyon sa maong makaluha nga presyo sa bombay.
Ang mas sakit nga kamatuoran kay niangkat hinuon ang Pilipinas og nilibo ka toneladang bombay sa gawas sa nasud nga giingon sa mga lokal nga mag-uuma nga maoy magpatay sa ilang panginabuhian.
Kining lindog: ‘Tingog sa Kabatan-onan’, abli sa inyong mga sugyot ug komento. Mamahimo kana ninyong mapaabot pinaagi niining akong numero 09638753562 o sa Facebook ug Messenger account: Wilson Auguis Subrio.
Modawat lamang og seryoso ug dili binuang. Mag-amping kita, mga Bol-anon!
