DILI makaapekto sa kampanya batok illegal nga drugas sa Philippine Drug Enforcement Agency (PDEA)-7 ang pag-ilis og bag-ong direktor sa maong buhatan sumala pa sa usa sa mga opisyal niini.
Ang tigpamaba sa PDEA-7 Leia Alcantara miingon nga epektibo sugod niadtong Enero 18, Miyerkules, ang pag-asumir sa bag-ong Regional Director nga si Jigger Montallana hulip kang Levi Ortiz.
Si Ortiz mabalhin sa Rehiyon 2 samtang si Montallana gikan sa Rehiyon 10. Hinuon si Montallana dili na bag-o sa Central Visayas tungod kay nahimo na sab kining Regional Director sa PDEA-7 niadtong tuig 2011.
Gihulagway hinoon ni Alcantara ang reshuffling sa PDEA normal nga proseso ug kabahin gyud sa ilahang trabaho. Bisan paman sa maong kausaban padayon ra ang operasyon sa maong ahensiya.
Kapin duha ka tuig nga nahimong director sa PDEA-7 si Ortiz, ni asumir kini sa katungdanan niadtong Hunyo 15, 2020. Ubos sa pamunoan ni Ortiz gikan Hunyo 15, 2020 hangtod sa Enero 17, 2023, 665 ka barangay ang nahimong drug-cleared, 41 ang drug free ug unom ka municipalities ang drug-cleared.
Ang Positive Operations nga nagpahigayon niresulta sa 378, 97 ka drug dens nga na dismantle ug daghan pang ubang anti-illegal drugs operations.
Niabot sab sa 141,391.60 grams; 157,850 Marijuana Plants; 5,084.28 grams Marijuana dried leaves; 3,178 pieces Ecstasy ang nakompiskar nga mobalor tanan og P1.0 billion.
Walo sab ka destruction sa drugs ang napahigayon nga mobalor og P766.6 million diin 107 kilos sa shabu, 98 kilos Marijuana, 2,984 pieces sa ecstasy ug uban pa. (RTB)
