GIKATAKDANG mupasaka ang Office of Governance Accountability and Review (OGAR) og mga kasong administratiba batok sa usa ka opisyal sa kagamhanang probinsiyal tungod sa giingong korapsyon, nga nagtimaan sa unang kalamposan sa kampanya batok sa korapsyon sa administrasyong Aumentado.
Si OGAR chairman Leoncio Evasco, Jr. nipahibawo sa press briefing niadtong Biyernes nga ang mga kasong administratiba, grave misconduct, gross neglect of duty ug paghimo sa usa ka buhat nga silotan sa Anti-Graft and Corrupt Practices Act ang ipasaka batok sa opisyal.
“Malipayon mi na mo report ninyo na naa na gyud mi file-an og kaso. Ang ebidensya ani mao ni among gipaningkamutan og utingkay-utingkay,” matod ni Evasco.
Sa laing bahin, giandam na sa OGAR ang laing kasong administratiba batok sa laing opisyal sa Kapitolyo nga ipasaka sa dili madugay.
“After ana, naa na puy mosulod. Immediately after, mo sunod na pud ning usa,” matod niya.
Wala hinuon hinganli ni Evasco ang mga opisyal ug gibutyag ang mga detalye sa mga kalapasan samtang nagpaabot nga madawat nila ang pahibalo sa mga pasangil batok kanila.
Kahinumduman nga si Gobernador Aris Aumentado, kinsa nakadaog sa eleksyon sa pagkagobernador niadtong 2022 tungod sa iyang anti-corruption platform, nagtukod dayon sa OGAR human ni-asumer sa iyang katungdanan niadtong Hulyo sa miaging tuig nga gitahasan kini sa pag-ugkat sa mga anomaliya ubos sa nangagi ug karon nga mga administrasyon ug pagpasaka og mga kaso batok na sa mga nalambigit.
Matod ni retired provincial prosecutor Macario Delusa, usa sa unom ka miyembro sa OGAR, nga ilang gipasaka ang mga reklamo partikular na sa Office of the Governor.
Ang OGAR usab adunay opsyon sa pagpasaka sa mga kasong administratiba ngadto sa Opisina sa Ombudsman o sa Komisyon sa Serbisyo Sibil apan gipili ang kagamhanang probinsiyal alang sa paspas nga aksyon sa maong butang.
“Ang findings sa OGAR isubmit sa opisina sa gobernador unya makita niya nga dunay basehanan gyud kining empleyado nga ma file-an og kaso,” matod ni Delusa.
Nagtuo usab ang retiradong regional trial court judge nga si Suceso Arcamo nga ang pagpasaka og kasong administratiba imbes nga kasong kriminal makahatag og mas paspas nga resulta.
“Administrative ang among gipili kay gusto mi og paspas na action. Paspas ang resulta. Kay og e-agi nato sa Ombudsman, abtan pa ta og siyam-siyam,” matod ni Arcamo.
Siya midugang nga ang usa ka administratibong kaso nanginahanglan lamang ug usa ka preponderance sa ebidensya, ang ikaduha nga lebel sa quanta of proof, samtang ang usa ka kriminal nga kaso nanginahanglan usa ka pruweba nga labaw sa makatarunganon nga pagduhaduha, ang labing taas sa hierarchy sa ebidensya.
Apan iyang namatikdan nga wala kini magpasabot nga dili na mapasaka ang kasong kriminal batok sa giingong kurakot nga kawani sa gobyerno. (RTB)
DILI MAGPAKAUWAW
Giklaro ni Office of Governance Accountability and Review Chairman Leoncio “Jun” Evasco Jr. nga ang OGAR igo lamang sa pag-rekomendar ngadto sa Ehekutiba ug dili mag-prosecute.
Kini human nipahigayon sa presscon sila uban sa Board of Consultants nga naglakip nila kanhi City Mayor Atty Dan Neri Lim, retired RTC Judge Suceso Arcamo, retired Provincial Prosecutor Macario Delusa ug Willy Ramasola.
Ilang giklaro nga ang ilang tahas mao ang “case buildup” sa mga posibleng nakalapas sa balaud; sa mga nangaging mga administrasyon ilabi na sa pag-usik usik sa kwarta sa katawhan.
Dugang pa niya nga dili sila magpakauwaw sa mga Bol-anon maoy hinungdan nga ilang sigurohon nga padaghanay kini sa ebidensya.
Mismo si Evasco ang namahayag nga dunay 2 ka mga empleyado sa Kapitolyo ang pasakahan sa mga kasong administratibo ngadto sa Civil Service Commission.
Wala pa hinuon gihinganlan nila ang mga personalidad nga pasakahan sa kaso.
“Kon maduso na ang mga rekomendasyon ngadto sa Ehekutiba nga gipangulohan ni Gob. Aris Aumentado, dunay bag-ong komitiba nga paga-umolon arun sigurohon nga “dili matulog” ang pagpasaka sa kaso sa mga salaud” , matud pa kang Evasco.
Suma pa ni kanhi mayor Atty Dan Neri Lim, nga dako kaayo ang ikatabang sa mga Budget Officer , Accountant ug Treasurer ngadto sa mga Local Chief Executive sanglit sila man nasuheto sa mga pasikot sikot kabahin sa budget.
Sukwahi kini sa mga naandan nga gikontrolar sa mga pipila sa pangagamhanan.
Gisegundahan kini ni Evasco nga ang Local Finance Committee dili kontra sa OGAR apan kaabag hinuon apan ilang gilantaw nga sa niageng administrasyon, nga dunay “mismanagement of funds”.
Namahayag usab si Evasco nga mas gipili nila nga administratibong kaso sanglit nga kon sa Ombudsman kini ipasaka, posibleng dunay kalangay niini.
Wala nagpasabot nga kon unsay dangatan sa administratibong kaso; abswelto man o konbiktado, mao usab sa mga criminal case.
“Lahi pa ang mga criminal charges ikompara sa administrative cases”, matud pa kang retired Prov’l Fiscal Macario Delusa.(Kahlil Lester O. Camba)
