GIAWHAG sa labing una nga babayeng mayor sa Catigbian ang mga Catigbianon nga kon mahimo mga ‘locally made o locally produced’ nga mga produkto ang paliton, aron makatabang nga mobalik og saka ang ekonomiya sa lungsod.
Sumala pa ni Mayor Abeth Mandin nga aron muuswag pa ang ekonomiya sa lungsod, siya nanawagan sa mga Catigbianon nga mopalit sa mga lokal nga produkto ilabi na sa gipamaligya sa merkado-publiko niini.
Si Mandin mipasabot nga kon mahimo nga mamalit adto sa mga gagmayng negosyante sa merkado inay ngadto sa mga dagkong grocery stores sa syudad.
Gihangyo usab sa mayor ang mga konsumidor nga dili na mohangyo sa presyo sa mga baligya ilabi na sa mga gagmayng negosyo.
Nasayran ni Mayor Mandin nga gibuhi pagbalik sa Department of Trade and Industry (DTI) nga “Buy Lokal” aron makabawi ang mga lokal nga negosyo, micro, gagmay ug medium nga negosyo gikan sa pagka-alkansi panahon niining pandemya.
Gipasabot ni Mandin nga ang “Shop Lokal” o “Buy Lokal” makapalambo sa ekonomiya dili lang sa Catigbian kon dili sa lalawigan usab. (RTB)
