BALIK nasab sa naandan nga trabaho ang Dengue Task Force sa siyudad sa Tagbilaran sa pagpangita ug pag guba sa mga lugar nga kapangitlogan sa mga lamok nga nagdala og dengue.
Suma pa ni bise mayor Adam Jala nga walay lain o kabag-ohan nga pagahimuon sa pakigbatok sa dengue kundi mao lang gyud ang paglimpyo sa palibot ug pagyabo sa tubig nga magpundo aron wa nay lugar nga makapadaghan ang lamok.
Asoy pa niya nga padayonon nila ang dengue awareness dili lang sa mga hamtong kundi lakip na sa mga kabataan.
“Pinaka best gyud to fight dengue is ang search and destroy,” suma pa ni Jala.
Siya nitataw nga nagkaestorya na sila ni Dr. Jea Pondoc, pangu sa City Health Office ug sila nagkasabot nga subsob ang ilang monitoring sa kaso sa dengue labi na sa panahon nga ting uwan.
Nihangyo si Jala sa kabarangayan nga awhagon nila ang ilang mga konstitwenti nga pirme gyud ang paglimpyo sa palibot aron malikayan ang pagdaghan sa lamok nga magdala sa sakit nga dengue. (RTB)
